आंब्याची आवक घटली, बाजारपेठेत तेजी

लोणच्याच्या कैर्‍यांना गृहिणींची मोठी पसंती

अमरावती /7 जुलै  – मान्सून सक्रिय होताच फलबाजारात आंब्याचा हंगाम आता अंतिम टप्प्यात पोहोचला आहे. सतत पडणार्‍या पावसामुळे आंबा लवकर खराब होऊ लागला आहे, ज्यामुळे प्रमुख जातींची आवक जवळपास बंद झाली आहे. दुसरीकडे,घराघरांमध्ये लोणचे घालण्याचा हंगाम सुरू झाल्याने लोणच्याच्या कैर्‍यांच्या मागणीत प्रचंड वाढ झाली आहे. याच
वेळी बाजारात विविध शहरांतून मोठ्या प्रमाणावर रसाळ जांभळे दाखल झाल्याने खरेदीदारांची गर्दी उसळत आहे.
पाऊस सुरू झाल्यानंतर हापूस, केसर,बैंगनपल्ली, गावरानी, लालबट्टा आणि चरकुबल्स यांसारख्या लोकप्रिय आंब्यांच्या जातींची आवक बंद झाली आहे. सध्या बाजारात केवळ नीलम आणि तोतापुरी आंबाच विक्रीसाठी पोहोचत आहे. पावसामुळे पिकलेले आंबे अधिक काळ टिकत नसल्याने व्यापार्‍यांनी मर्यादित प्रमाणात माल मागवणे सुरू केले आहे. उन्हाळा संपल्याने
गृहिणींकडून लोणच्याच्या कैरीची खरेदी मोठ्या प्रमाणावर होत आहे. आगामी काही दिवसांपर्यंत कैरीची मागणी अशीच कायम राहण्याची शक्यता व्यापार्‍यांनी वर्तवली आहे. मान्सूनसोबतच बाजारात जांभळाची आवकही शिखरावर पोहोचली आहे. विविध शहरांतून ताजी आणि रसाळ जांभळे मोठ्या प्रमाणात येत आहेत. रविवारी सुमारे 70 क्विंटल जांभूळ विक्रीसाठी आले. घाऊक बाजारात जांभळाला 3,000 ते 6,000 रुपये प्रति क्विंटलचा दर मिळत आहे. उत्तम गुणवत्ता आणि चवीमुळे किरकोळ बाजारातही याची विक्री जोमाने सुरू आहे. आगामी दिवसांत आंब्याची आवक घटत जाईल, तर जांभळाची मागणी आणखी वाढण्याची शक्यता आहे. रविवारच्या बाजारात नीलम आंब्याची आवक 120 क्विंटल झाली असून त्याला 2000 ते 2500 रुपये भाव मिळाला. तोतापुरी आंब्याची आवक 110 क्विंटल होऊन 1600 ते 2200 रुपये दर मिळाला, तर सर्वाधिक मागणी असलेल्या कैरीची 210 क्विंटल आवक होऊन तिला 4000 ते 5000 रुपये प्रति क्विंटलचा भाव मिळाला आहे.