शंकर सुवन केसरी नंदन च्या जयघोषाने चांगापूर दुमदुमले

तुळशीदास जयंतीनिमित्त संगीतमय सुंदरकांडाचे भव्य आयोजन

अमरावती /17 ऑगस्ट- रामचरितमानसाचे रचयिता संतश्रेष्ठ गोस्वामी तुळशीदास महाराज यांच्या जयंतीनिमित्त चांगापूर येथील चांगापूर नरेश हनुमान मंदिरात रविवारी संगीतमय सुंदरकांडाचे भव्य आयोजन करण्यात आले. अनिल अग्रवाल (नरेडी), हेमलता अग्रवाल (नरेडी) आणि तुळशीदास जयंती समितीच्या संयुक्त पुढाकाराने झालेल्या या धार्मिक सोहळ्यात शेकडो भाविकांनी सहभाग घेतला. पुणे येथील कलाकारांच्या भावपूर्ण सादरीकरणामुळे मंदिर परिसरात भक्तिमय वातावरण निर्माण झाले. ‘शंकर सुवन केसरी नंदन, तेज प्रताप महा जग वंदन’ या चौपाईसह श्रीराम आणि हनुमानाच्या जयघोषाने संपूर्ण परिसर दुमदुमून गेला. पहाटे हनुमानाच्या विशेष पूजेनंतर महाआरती करण्यात आली.
त्यानंतर संगीतमय सुंदरकांडाला सुरुवात झाली. पुणे येथील जॉयफुल सुंदरकांड समूह तसेच आर्ट ऑफ लिव्हिंगशी संबंधित सुनील पोद्दार, मीनू पोद्दार आणि संजय पारख यांनी आपल्या मधुर आवाजातून सुंदरकांडाचे सादरीकरण केले. चौपाई, भजन आणि भक्तिगीतांच्या सुरांनी भाविक अक्षरशः भक्तिरसात न्हाऊन निघाले. सादरीकरणादरम्यान ‘जय श्रीराम’ आणि ‘बजरंगबली की जय’च्या घोषणांनी वातावरण अधिकच भारावून गेले. अनेक भाविक भजनात तल्लीन झाले, तर काहींनी ध्यानमग्न होऊन हनुमानाचे स्मरण केले. हा धार्मिक सोहळा सलग पाचव्या वर्षी आयोजित करण्यात आला. यापूर्वी दोन वेळा महेश भवन येथे, तर दोन वेळा चांगापूर येथे सुंदरकांडाचे आयोजन करण्यात आले होते. यंदाही चांगापूर नरेशाच्या सान्निध्यात हा सोहळा घेऊन धार्मिक आणि सांस्कृतिक वातावरण अधिक बळकट करण्याचा प्रयत्न करण्यात आला.
सुंदरकांड हा केवळ धार्मिक पाठ नसून मनाला शांतता, आत्मविश्वास आणि सकारात्मक ऊर्जा देणारा आध्यात्मिक आधार असल्याची भावना आयोजकांनी व्यक्त केली. सुंदरकांडातील चौपायांचे संगीतबद्ध सादरीकरण, त्याला भजनांची मिळालेली साथ आणि वाद्यवृंदाचा सुरेल ठेका यामुळे मंदिर परिसरात जणू भक्तीची लाटच उसळली होती. हनुमानाच्या महिमेचे वर्णन करणार्‍या चौपायांवर भाविकांनी टाळ्यांचा कडकडाट आणि जयघोष करीत उत्स्फूर्त प्रतिसाद दिला. अनेक भाविकांनी हा सोहळा आयुष्यातील अविस्मरणीय आध्यात्मिक अनुभव असल्याचे सांगितले.
कार्यक्रमाला उपस्थित महानगरपालिका नगरसेवक अनिल अग्रवाल यांच्यासह विविध मान्यवरांचे आयोजकांकडून स्वागत करण्यात आले. कार्यक्रमाच्या समारोपप्रसंगी सुनील पोद्दार, मीनू पोद्दार आणि संजय पारख यांचा नरेडी परिवाराच्या वतीने उपरणे व पुष्पगुच्छ देऊन सत्कार करण्यात आला. सुंदरकांड सादरीकरणात वाद्यांची साथ देणार्‍या कलाकारांचाही यावेळी गौरव करण्यात आला.
कार्यक्रमाला अनिल अग्रवाल (नरेडी), सुनील नरेडी, हेमलता नरेडी, रेखा नरेडी, सर्वेश नरेडी, कविता नरेडी, नमन नरेडी, मानव नरेडी यांच्यासह नरेडी परिवारातील सदस्य, शहरातील विविध मान्यवर, धर्मप्रेमी नागरिक आणि मोठ्या संख्येने भाविक उपस्थित होते. तुळशीदास जयंतीनिमित्त झालेला हा सोहळा केवळ धार्मिक कार्यक्रम न राहता भक्ती, संगीत, सामाजिक एकोपा आणि संस्कृतीचा सुंदर संगम ठरला. चांगापूर नरेशाच्या दरबारात घुमलेल्या चौपाया आणि भजनांनी उपस्थितांच्या मनात भक्तीभाव जागवला. या माध्यमातून धार्मिक परंपरा जपत समाजाला संस्कार आणि अध्यात्माशी जोडण्याचा संदेशही देण्यात आला.हनुमानाच्या कृपेनेच धार्मिक कार्याला बळमुख्य आयोजक अनिल अग्रवाल (नरेडी) यांनी हनुमानावर आपली अढळ श्रद्धा असल्याचे सांगितले. हनुमानाचे स्मरण केल्याने आत्मिक बळ आणि सकारात्मक ऊर्जा मिळते. दरवर्षी अशा धार्मिक कार्यक्रमाचे आयोजन करण्याची प्रेरणाही हनुमानाच्या कृपेतूनच मिळते. हे कार्य केवळ आपले नसून प्रभूचा आशीर्वाद आणि समाजाला धर्म, संस्कार व भक्तीशी जोडण्याची प्रेरणा असल्याची भावना त्यांनी व्यक्त केली.
भक्तीमय वातावरणाने भाविक भारावले सुंदरकांडाच्या प्रत्येक चौपाईसोबत भाविकांचा उत्स्फूर्त प्रतिसाद मिळत होता. मंदिर परिसरात टाळ्यांचा कडकडाट, भजनांचे सूर आणि हनुमानाच्या जयघोषामुळे वातावरणात चैतन्य निर्माण झाले. काही काळासाठी चांगापूर नरेशाचे मंदिर भक्ती आणि अध्यात्माच्या सुरांनी अक्षरशः न्हाऊन निघाले होते.परंपरेला पाच वर्षांची अखंड साथतुळशीदास जयंतीनिमित्त सुंदरकांडाचे आयोजन करण्याची ही परंपरा सलग पाचव्या वर्षीही उत्साहात पार पडली.
महेश भवन आणि चांगापूर येथे यापूर्वी झालेल्या कार्यक्रमांनंतर यंदा पुन्हा चांगापूर नरेशाच्या सान्निध्यात हा सोहळा झाल्याने भाविकांमध्ये विशेष उत्साह दिसून आला.एकत्रित भक्तीने सामाजिक एकोप्याला बळया सोहळ्यात विविध समाजघटकांतील भाविक एकत्र आले. धार्मिक कार्यक्रमाच्या निमित्ताने निर्माण झालेल्या या भक्तिमय वातावरणातून सामाजिक सलोखा, परस्पर स्नेह आणि सांस्कृतिक परंपरा जपण्याचा संदेश मिळाला.