विकासाच्या नावावर वृक्षतोड म्हणजे पर्यावरणाची मोठी हाणी

बेकायदेशीर वृक्षतोडीवर नियंत्रण ठेवण्याची नागरिकांची मागणी

अंजनगाव सुर्जी /12 नोव्हेंबर: निसर्गाचा समतोल राखण्यात वृक्षांची भूमिका अनन्यसाधारण आहे. मात्र, विकासाच्या धावपळीत आणि विविध कारणांमुळे वृक्षांची होणारी घट पर्यावरणाच्या दृष्टीने चिंतेचा विषय ठरत आहे. अंजनगाव सुर्जी शहर आणि परिसरात हरित क्षेत्र वाढविण्यासाठी नियोजनबद्ध वृक्षारोपणाची आवश्यकता निर्माण झाली असून, केवळ रोपे लावण्यापुरती मोहीम मर्यादित न ठेवता त्यांचे संगोपन आणि संरक्षण करण्यावर भर देणे गरजेचे झाले आहे.
शहरातील तसेच ग्रामीण भागातील ज्या ठिकाणी मोठ्या प्रमाणावर वृक्षतोड झाल्याचे निदर्शनास आले आहे, त्या ठिकाणांची संबंधित विभागाने पाहणी करून वस्तुस्थिती तपासावी. वृक्षतोडीमागील कारणे, आवश्यक परवानग्या आणि लागू असलेल्या नियमांचे पालन झाले आहे किंवा नाही, याची पडताळणी करणे महत्त्वाचे आहे. नियमबाह्य वृक्षतोड आढळल्यास प्रचलित कायद्यानुसार योग्य ती कारवाई करण्यात यावी, अशी अपेक्षा पर्यावरणप्रेमी नागरिकांकडून व्यक्त होत आहे.
यंदा पावसाचे प्रमाणही अपेक्षेप्रमाणे राहिले नसल्याने पर्यावरण संवर्धनाचा प्रश्न अधिक गंभीर झाला आहे. पावसाचे अनियमित स्वरूप, वाढते तापमान आणि घटते हरित क्षेत्र यांचा परस्पर संबंध लक्षात घेता वृक्षसंवर्धनाला प्राधान्य देण्याची वेळ आली आहे. झाडे केवळ सावली देत नाहीत, तर हवेची गुणवत्ता सुधारण्यास, जमिनीतील ओलावा टिकविण्यास आणि जैवविविधतेचे संरक्षण करण्यासही मदत करतात.
नगर परिषद, वन विभाग आणि संबंधित प्रशासकीय यंत्रणांनी समन्वय साधून शहरात आणि परिसरात वृक्षगणना, वृक्षारोपण तसेच नियमित देखरेखीचे नियोजन करावे. लावलेल्या प्रत्येक रोपाच्या जगण्याची जबाबदारी निश्चित करून त्यासाठी पाणी, संरक्षण जाळी आणि आवश्यक निगा उपलब्ध करून द्यावी.
आज लावलेले एक रोप उद्याच्या पिढीला सावली देऊ शकते. त्यामुळे वृक्षतोडीवर नियमांनुसार नियंत्रण आणि वृक्षसंवर्धनासाठी सामूहिक पुढाकार ही काळाची गरज आहे. अंजनगाव सुर्जीने हरित शहराच्या दिशेने ठोस पावले उचलण्याची अपेक्षा व्यक्त होत आहे.