दिवाळीनंतर नाट्यरसिकांना मिळणार नाट्यप्रयोगांची मेजवानी

राज्य नाट्य स्पर्धेच्या तालमी रंगू लागल्या!

अमरावती/12 नोव्हेंबर : सांस्कृतिक कार्य संचालनालय आयोजित 65 व्या महाराष्ट्र राज्य हौशी मराठी नाट्यस्पर्धेच्या अमरावती केंद्रावरील प्राथमिक फेरीसाठी नाट्यसंस्थांच्या तालमींना जोरदार सुरुवात झाली आहे. शहरातील श्री छत्रपती शिवाजी महाराज सभागृह पंचवटी चौक अमरावती येथे दिनांक 23 नोव्हेंबर 2026 पासून या स्पर्धेला प्रारंभ होणार असून, दररोज सायंकाळी 7 वाजता नाटकांचे प्रयोग सादर करण्यात येणार आहेत. त्यामुळे अमरावती व परिसरातील नाट्यरसिकांना दिवाळीनंतर दर्जेदार नाट्यप्रयोगांची मेजवानी अनुभवता येणार आहे.
महाराष्ट्राला समृद्ध नाट्यपरंपरेचा वारसा लाभला आहे. या परंपरेचे जतन व संवर्धन करण्याबरोबरच हौशी कलाकारांना आपल्या कलागुणांना वाव मिळावा, या उद्देशाने सांस्कृतिक कार्य संचालनालयामार्फत दरवर्षी राज्य नाट्यस्पर्धेचे आयोजन करण्यात येते. या स्पर्धेच्या माध्यमातून विविध नाट्यसंस्थांमधील कलाकार, दिग्दर्शक, लेखक आणि तंत्रज्ञ यांना आपली कलाकृती सादर करण्यासाठी व्यासपीठ उपलब्ध होते. राज्याचे सांस्कृतिक कार्य मंत्री अ‍ॅड. आशिष शेलार यांच्या मार्गदर्शनाखाली तसेच सांस्कृतिक कार्य विभागाचे सचिव डॉ. किरण कुलकर्णी यांच्या नियोजनानुसार या स्पर्धेचे आयोजन करण्यात येत आहे.अमरावती आदी भागांतील एकूण 22 नाट्यसंस्था या केंद्रावरील प्राथमिक फेरीत सहभागी होणार आहेत. स्पर्धेच्या तयारीसाठी कलाकार आपापल्या दैनंदिन कामकाजातून वेळ काढून तालमी करत आहेत. संवादफेक, अभिनय, नेपथ्य, प्रकाशयोजना, रंगभूषा, वेशभूषा आणि रंगमंचावरील हालचाली यांचा कसून सराव सुरू आहे.यंदाच्या स्पर्धेत विविध विषयांवरील नाटके सादर होणार असल्याने प्रेक्षकांना वेगवेगळ्या आशयांचे आणि नाट्यशैलींचे दर्शन घडणार आहे. स्पर्धेच्या निमित्ताने सहभागी नाट्यसंस्थांमध्ये कलात्मक चुरस पाहायला मिळणार असून, कलाकारांच्या मेहनतीचा आणि सर्जनशीलतेचा अनुभव नाट्यरसिकांना घेता येणार आहे. श्री छत्रपती शिवाजी महाराज सभागृह पंचवटी चौक अमरावती येथे होणार्‍या या स्पर्धेतील नाट्यप्रयोगांना नाट्यरसिकांनी मोठ्या संख्येने उपस्थित राहून हौशी कलाकारांचा उत्साह वाढवावा, असे आवाहन सांस्कृतिक कार्य संचालनालयाचे संचालक श्री. प्रशांत खेडेकर यांनी केले आहे. अमरावतीकर रसिकांनी जास्तीत जास्त संख्येत उपस्थित रहावे असे आवाहन समन्वयक विशाल फाटे आणि नाट्य परिषद अध्यक्ष चंद्रशेखर डोरले यांनी केले आहे.