महापालिका प्रशासनाने आमसभेचे इतिवृत्त परस्पर बदलले

प्रशासनाकडून कोणार्क कंपनीला आर्थिक फायदा

अमरावती/20 मे– गेल्या 23 एप्रिल रोजी झालेल्या आमसभेतील महापौरांनी दिलेल्या निर्देशाची इतिवृत्तात नोंद घेताना अगदी विरुद्ध नोंद घेऊन कोनार्क कंपनीला आर्थिक फायदा व्हावा या हेतूने इतिवृत्तच बदलण्यात आले. असा खळबळजनक प्रकार आज झालेल्या महापालिका आमसभेत उघडकीस आल्याने प्रशासनाची कोणार्क कंपनीशी असलेली साठगाठ जनतेसमोर उघडी पडली आहे.
मागील आमसभेत महापौर श्रीचंद तेजवाणी यांनी कोनार्क कंपनीला तीन महिन्यांचे देयक अदा न करण्याचा निर्णय सभागृहात सर्वानुमते झाला असे जाहीर केले असताना, प्रशासनाने मात्र इतिवृत्तात कंपनीला पैसे देण्याचे नमूद केल्याचे आज उघड झाले. या गंभीर प्रकारामुळे आजची आमसभा कमालीची वादळी ठरली. लोकप्रतिनिधींनी प्रशासनाला धारेवर धरत तीव्र संताप व्यक्त केला असून, आगामी सभेत सुधारित इतिवृत्त सादर करण्याचे आदेश देण्यात आले आहेत. विधानपरिषद निवडणुकीच्या आचारसंहितेमुळे आजची महापालिकेची आमसभा अत्यंत शांततेत पार पडेल अशी चिन्हे होती. सकाळी दहा वाजता डॉ. बाबासाहेब आंबेडकर सभागृहात सभा सुरू होताच मागील सभेचे इतिवृत्त मंजुरीसाठी ठेवण्यात आले. या वेळी स्वीकृत नगरसेवक मिलिंद चिमोटे, अनिल अग्रवाल तसेच नगरसेवक धीरज हिवसे आणि मंगेश मनोहरे यांनी इतिवृत्तातील एका मोठ्या चुकीकडे महापौर श्रीचंद तेजवाणी व महापालिका आयुक्त वर्षा लढ्ढा यांचे लक्ष वेधले. गेल्या 23 एप्रिल रोजी झालेल्या आमसभेत शहरातील साफसफाईचा कंत्राटदार असलेल्या कोनार्क कंपनीचे तीन महिन्यांचे देयक रोकून धरण्याचा निर्णय झाला होता. या सभेच्या सर्व चित्रफिती आणि वृत्तपत्रांमधील बातम्या पुरावा म्हणून उपलब्ध असतानाही, प्रशासनाने इतिवृत्तात थेट उलट नोंद करून कंपनीला देयक देण्याचे निश्चित केले. हा गंभीर घोळ समोर येताच सभागृहात एकच गदारोळ झाला. मिलिंद चिमोटे आणि अनिल अग्रवाल यांनी प्रशासनावर थेट हल्लाबोल करत, कोनार्क कंपनीला गैरमार्गाने आर्थिक फायदा पोहोचवण्यासाठीच हा डाव आखण्यात आल्याचा आरोप केला. याचसोबत शहराच्या स्वच्छता समितीच्या अहवालाबाबतही प्रशासनाने कमालीची उदासीनता दाखवल्याचे समोर आले. निविदा अटींमधील तफावत आणि अस्वच्छतेचा अभ्यास करण्यासाठी स्थापन केलेल्या समितीच्या अहवालावर मागील सभेत झालेली सविस्तर चर्चा इतिवृत्तांतून गायब करण्यात आली होती. केवळ ’अहवाल सादर’ एवढीच त्रोटक नोंद करून प्रशासनाने आपली जबाबदारी झटकली. सदस्यांच्या तीव्र विरोधामुळे अखेर बॅकफूटवर आलेल्या प्रशासनाला नमते घ्यावे लागले. या दोन्ही महत्त्वाच्या विषयांवर इतिवृत्तात योग्य ते बदल करून ते आगामी सभेत मंजुरीसाठी ठेवण्याचे सर्वानुमते ठरले आणि आचारसंहितेच्या पार्श्वभूमीवर इतर प्रशासकीय कामकाज आटोपून सभा स्थगित करण्यात आली.

स्वच्छता समितीच्या अहवालाची चर्चा गायब

अमरावती शहरातील साफसफाईच्या अटींचे उल्लंघन करणार्‍या कंत्राटदाराची पाठराखण करण्यासाठी महापालिका प्रशासनाने थेट इतिवृत्तातच फेरफार केल्याने संशयाचे धुके गडद झाले आहे. लोकप्रतिनिधींच्या सतर्कतेमुळे प्रशासनाचा हा डाव उधळला गेला असून अमरावतीकरांमध्ये संताप व्यक्त होत आहे.