शहरात भाजीपाल्यासारखी होतेय ‘एमडी’ची विक्री

साईनगरचा तरुण साडेतीन लाखांच्या ’नशे’सह जेरबंद

अमरावती / 17 मार्च : शहरात आता अमली पदार्थांची विक्री इतकी फोफावली आहे की, जणू भाजीपाल्याप्रमाणे हे घातक विष खुलेआम विकले जात असल्याचे भयाण वास्तव समोर आले आहे. चहा-नाश्त्याच्या उपाहारगृहात खाद्यपदार्थांऐवजी चक्क ’एमडी’ सारख्या महागड्या नशा देणार्‍या द्रव्याची देवाणघेवाण होत असल्याने नागरिकांमध्ये संताप व्यक्त होत आहे. गुन्हे शाखेने साईनगर परिसरात धाड टाकून साडेतीन लाखांच्या अमली पदार्थासह एकाला बेड्या ठोकल्या असून, या कारवाईने शहरातील मोठ्या तस्करीचे जाळे उघड झाले आहे. अमरावती शहराच्या शांततेला आणि संस्कृतीला अमली पदार्थांच्या विळख्याने पोखरून काढले आहे. आज दिनांक 17 मार्च 2026 रोजी संध्याकाळी साडेसहा वाजेच्या सुमारास गुन्हे शाखेच्या पथकाने राजापेठ पोलीस ठाण्याच्या हद्दीत केलेली कारवाई याचे जिवंत उदाहरण ठरली आहे. शहरातील साईनगर परिसरातील बेनाम चौक येथे असलेल्या एका चहा-नाश्त्याच्या उपाहारगृहात चक्क अमली पदार्थांचा बाजार भरल्याची धक्कादायक माहिती समोर आली. चहा पिण्याच्या बहाण्याने तरुण पिढीला या विषारी विळख्यात ओढण्याचे कारस्थान येथे सुरू होते. गुन्हे शाखेने अचानक छापा टाकला असता, समर्थवाडी येथील 26 वर्षीय तरुण महेश राजू खोडे याच्या ताब्यातून 23.530 ग्रॅम वजनाचे ’एमडी’ नावाचे अमली द्रव्य जप्त करण्यात आले. या जप्त केलेल्या मालाची किंमत सुमारे 3,52,750 रुपये इतकी प्रचंड आहे. शहरात आता हे घातक अमली पदार्थ भाजीपाल्यासारखे सहज उपलब्ध होत असल्याचे या कारवाईवरून स्पष्ट झाले आहे. विशेषतः खाण्यापिण्याच्या गाड्यांवर आणि गल्लीबोळातील टपर्‍यांवर अशा प्रकारची देवाणघेवाण वाढल्याने पोलिसांसमोर मोठे आव्हान उभे राहिले आहे. आरोपी महेश खोडे याला ताब्यात घेऊन पोलिसांनी आता या तस्करीच्या मुळाशी जाण्यास सुरुवात केली आहे. इतक्या मोठ्या प्रमाणात अमली पदार्थ चहाच्या गाड्यांवर पोहोचतातच कसे, असा संतप्त सवाल आता सर्वसामान्य नागरिक विचारत आहेत. या कारवाईमुळे अवैध धंदे करणार्‍यांचे धाबे दणाणले असून, गुन्हे शाखेने या तस्करीचे जाळे मुळापासून उपटून काढण्यासाठी कंबर कसली आहे. अमरावती शहरात अमली पदार्थांचा साठा मोठ्या प्रमाणात असून, यामागचे मुख्य सूत्रधार कोण आहेत, याचा तपास आता वेगाने सुरू आहे.
खाद्यपदार्थांच्या आड मृत्यूचा व्यापार-चहा आणि नाश्त्याच्या उपाहारगृहात आता नाश्त्याऐवजी मृत्यूचे सामान विकले जात आहे. हे विष अमरावतीतील तरुण पिढीला उद्ध्वस्त करत आहे. भाजीपाल्यासारखी होणारी ही विक्री रोखण्यासाठी आता पोलिसांना अधिक कडक पावले उचलण्याची गरज निर्माण झाली आहे.