बोगस व्हेंटिलेटर कंपनीच डफरीनच्या अग्निकांडाला कारणीभूत

नेत्यांच्या आरोप-प्रत्यारोपातून नागरिकांच्या समस्येकडे दुर्लक्ष

वादग्रस्त नेत्यांना मुख्यमंत्र्यांनी समज द्यावी

अमरावती/30 ऑगस्ट– स्थानिक जिल्हा महिला रुग्णालयातल्या नवजात बालकांच्या अतिदक्षता विभागात पेटलेल्या आगीत तीन लहानग्यांचा होरपळून जीव गेल्याची काळीज पिळवटून टाकणारी घटना घडली आहे.
या भीषण अपघाताने संपूर्ण महाराष्ट्र हादरला असून राजकीय वर्तुळात प्रचंड संताप व्यक्त होत आहे. ठाकरे गटाचे खा. अरविंद सावंत यांनी थेट रुग्णालयात जाऊन या दुर्घटनेची पाहणी केली. त्यांनी वैद्यकीय अधीक्षक विनोद पवार यांची भेट घेऊन सुरक्षेच्या ढिसाळ कारभारावर जोरदार ताशेरे ओढले. सुरक्षेच्या नावाने बोंब असलेल्या या सरकारी दवाखान्यात व्हेंटिलेटर कंपन्याच आता सरकारला व्हेंटिलेटरवर आणत असल्याचे भयानक वास्तव त्यांनी उघड केले. आग लागल्यावर एकमेकांवर चिखलफेक करणार्‍या दोन मंत्र्यांचे कान मुख्यमंत्री आणि उपमुख्यमंत्र्यांनी तात्काळ उपटले पाहिजेत, अशी घणाघाती मागणी करत खा. सावंत यांनी सरकारच्या संवेदनाहीन कारभाराची पिसे काढली आहेत. अमरावतीतील ही दुर्घटना म्हणजे केवळ अपघात नसून सरकारी अनास्थेने घेतलेला बळी आहे. रुग्णालयातील सुरक्षेच्या आणि अग्नीरोधकयंत्रणेच्या नावाने बोंबाबोंब असताना मंत्री मात्र आपसात भांडण्यात व्यस्त आहेत. आरएसएस प्रमुख मोहन भागवत यांनी अमेरिकेत जाऊन ज्ञान पाजळण्यापेक्षा देशात राहून उ. प्र. चे मुख्यमंत्री योगी आदित्यनाथ आणि महाराष्ट्रातील नेत्यांना सुबुद्धी द्यावी, असा टोला त्यांनी लगावला. दुसरीकडे सत्ता टिकवण्यासाठी ठाकरेंच्या पाठीत खंजीर खुपसणारे आ. एकनाथ शिंदे आणि त्यांचे साथीदार आज मराठा आरक्षणाचा खेळखंडोबा करत आहेत. मनोज जरांगे यांच्या आंदोलनावर तोडगा काढण्याऐवजी समाजात जातीपातीचे विष कालवले जात आहे. तमिळनाडूच्या धर्तीवर 50 टक्क्यांची आरक्षण सीमा वाढवली तरच गरीब आणि मागास समाजाला न्याय मिळेल. मतांच्या राजकारणासाठी लाडक्या बहिणींची फसवणूक करणार्‍या या सरकारला जनताच धडा शिकवेल, असा सणसणीत इशारा खा. सावंत यांनी दिला.
खास पेटी: सरकारी अनास्था आणि करपलेले बालपण-अमरावतीच्या रुग्णालयातील आग ही निव्वळ तांत्रिक चूक नसून प्रशासनाचा निष्काळजीपणा आहे. चिमुकल्यांचा जीव गेला तरी अग्निसुरक्षेचा तपास कागदावरच राहिला. व्हेंटिलेटरच्या खरेदीत गैरव्यवहार करून सरकार स्वतःच व्हेंटिलेटरवर गेले आहे. मंत्री आपापली कातडी वाचवण्यात गुंग असून मुख्यमंत्री या नाकर्त्या मंत्र्यांवर कारवाई करण्याचे धाडस दाखवणार का, असा रोखठोक सवाल आता जनतेतून विचारला जात आहे.