गरीब पोरांसाठी उघडली सरकारी दारे

स्पर्धा परीक्षेच्या युवकांना मिळाला मोठा आधार

अमरावती/12 एप्रिल– ग्रामीण भागातील गरीब आणि कष्टाळू विद्यार्थ्यांसाठी राज्य शासनाच्या सामाजिक न्याय विभागाने एक अत्यंत दिलासादायक निर्णय घेतला असून, आता उन्हाळ्याच्या सुटीतही त्यांना सरकारी वसतिगृहात राहता येणार आहे. दहावी आणि बारावीच्या परीक्षा संपल्यानंतर दरवर्षी रिकामी होणारी ही वसतिगृहे आता ’नीट’ आणि ’जेईई’ सारख्या कठीण परीक्षांची तयारी करणार्‍या विद्यार्थ्यांसाठी उघडी राहणार आहेत.
या निर्णयामुळे ऐन परीक्षेच्या काळात भाड्याच्या खोलीसाठी होणारी विद्यार्थ्यांची वणवण आणि पालकांचे होणारे आर्थिक हाल कायमचे थांबणार आहेत. अमरावती जिल्ह्यातील अशा 24 सरकारी मागासवर्गीय वसतिगृहांमध्ये ही सोय उपलब्ध करून देण्यात आली आहे. या सवलतीचा लाभ घेण्यासाठी विद्यार्थ्यांना केवळ आपल्या महाविद्यालयाचे ओळखपत्र आणि स्पर्धा परीक्षेला बसल्याचा पुरावा सादर करावा लागेल. सुटीच्या काळात राहण्याची सोय विनामूल्य असली, तरी जेवणाची व्यवस्था मात्र विद्यार्थ्यांना स्वतःच्या खर्चाने करावी लागणार आहे. वसतिगृहातील शिस्तीचे काटेकोर पालन करणे सर्वांना बंधनकारक असेल. या संधीमुळे ग्रामीण भागातील विद्यार्थ्यांचा शैक्षणिक पाया अधिक भक्कम होणार असून, शेकडो युवकांनी या सुविधेचा लाभ घ्यावा, असे आवाहन समाज कल्याण विभागाचे सहाय्यक आयुक्त राजेंद्र जाधव यांनी केले आहे.
खिशाला बसणारी आर्थिक कात्री थांबली-शिक्षणाची वणवण आता कायमची संपणार शहरात दोन-तीन महिन्यांसाठी भाड्याने खोली मिळवणे आणि खानावळीचा मोठा खर्च पेलणे गरीब पालकांसाठी कठीण होते. सरकारी वसतिगृहे सुटीतही सुरू राहणार असल्याने विद्यार्थ्यांचा 5 ते 10 हजार रुपयांचा मासिक खर्च वाचणार असून, त्यांना अभ्यासासाठी सुरक्षित वातावरण मिळणार आहे.