1 कोटीचे अंजीर विकणार्‍या टोळीचा भंडाफोड

* 4 आरोपी मुद्देमालासह अटक

अमरावती /14 जानेवारी : मुंबईहून दिल्लीकडे निघालेल्या 1 कोटी 10 लाख रुपयांच्या अफगाणी अंजीराच्या महाकाय साठ्याची लूट करणार्‍या आंतरराष्ट्रीय टोळीला अमरावतीत अत्यंत शिताफीने जेरबंद करण्यात आले आहे. 6 जानेवारी रोजी मुंबईहून 2230 पेट्या घेऊन निघालेला हा ट्रक 10 जानेवारीपर्यंत दिल्लीला पोहोचलाच नव्हता, तो राजस्थानमधील कोटा येथे रिकाम्या अवस्थेत आढळून आला होता. या प्रकरणातील संशयित आरोपी अमरावतीमधील एका उच्चभ्रू उपहारगृहात वास्तव्यास असल्याची खात्री पटताच, राजस्थान पोलिसांनी स्थानिक मदतीने या टोळीच्या मुसक्या आवळल्या. अमरावतीच्या एका सुज्ञ सुका मेवा व्यापार्‍याने दाखवलेली तत्परता आणि धोरणीपणामुळे हा कोट्यवधींचा आंतरराष्ट्रीय माल आणि लुटारू कायद्याच्या कचाट्यात सापडले आहेत. अफगाणिस्तानमधील तणावाच्या परिस्थितीमुळे सध्या तेथील सुका मेवा रस्तेमार्गे न येता समुद्रमार्गे मुंबईत दाखल होत आहे. तेथून हा माल देशभरात वितरीत केला जातो. याच साखळीतील 1 कोटी 10 लाख रुपयांचा माल चोरून पसार झालेले लुटारू जेव्हा अमरावतीत हा माल विकण्यासाठी आले, तेव्हा स्थानिक व्यापार्‍याला संशय आला. संशयित आरोपींनी अत्यंत स्वस्त दरात उच्च दर्जाचे अंजीर देण्याचे आमिष दाखवले होते. मात्र, अमरावतीच्या व्यापार्‍याने न डगमगता त्या मालाचे चित्रीकरण केले आणि मुंबईतील आपल्या ओळखीच्या व्यापार्‍याशी संपर्क साधून खात्री केली. हा माल त्याच लुटलेल्या साठ्याचा भाग असल्याचे स्पष्ट होताच, व्यापार्‍याने आरोपींना 50 पेट्यांच्या खरेदीचे आमिष दाखवून अमरावतीतच रोखून धरले.
या काळात मुंबईचे व्यापारी आणि राजस्थान पोलिसांचे पथक तातडीने अमरावतीत दाखल झाले. चित्रा चौकातील एका हॉटेलमधून या टोळीतील 3 ते 4 सदस्यांना 50 पेट्या मालासह ताब्यात घेण्यात आले. जप्त केलेल्या पेट्यांवरील सांकेतिक क्रमांक आणि संच क्रमांक हे लुटलेल्या मालाशी तंतोतंत जुळले आहेत. अमरावतीच्या व्यापार्‍याने दाखवलेली ही सतर्कता केवळ व्यापार क्षेत्रासाठीच नव्हे, तर गुन्हेगारी रोखण्यासाठी एक आदर्श ठरली आहे. सध्या राजस्थान पोलीस सर्व आरोपींना घेऊन कोटा येथे रवाना झाले असून, या गुन्ह्यातील इतर साथीदारांचा आणि उर्वरित मालाचा शोध घेण्यासाठी सखोल चौकशी केली जात आहे.
अमरावतीच्या व्यापार्‍याची समयसूचकता -लुटलेला माल विकण्यासाठी आलेल्या टोळीवर संशय येताच अमरावतीच्या व्यापार्‍याने अत्यंत चातुर्याने मालाचे चलचित्र मुद्रित केले. मुंबईतील व्यापार्‍यांशी संपर्क साधून मालाची ओळख पटवली आणि पोलिसांना येईपर्यंत आरोपींना मोठ्या खरेदीचे आमिष दाखवून शहरातच अडकवून ठेवले. याच सतर्कतेमुळे कोट्यवधींची ही मोठी लूट उघडकीस आली आहे.