रद्द केलेले आणि कायम ठेवलेले नामांकन प्रकरण पोहचले न्यायालयात

सचिन भेंडे यांचाही न्यायालयात ‘कॅवेट’साठी धाव

अमरावती /1 जानेवारी – अमरावती महानगरपालिका निवडणुकीसाठी नामांकन प्रक्रिया पूर्ण झाल्यानंतर, नामांकनांची छाननी आणि वैध आणि अवैध नामांकनांची यादी जाहीर करण्याची प्रक्रिया सध्या सुरू आहे. बुधवारी अनेक उमेदवारांच्या विरोधकांनी त्यांच्या नामांकनांवर आक्षेप नोंदवले आणि ते रद्द करण्याची मागणी केली. यामुळे प्रभाग क्रमांक 18 ड मधून भाजप उमेदवार राजेश शादी यांचा नामांकन अर्ज चुकीच्या मालमत्तेच्या तपशीलामुळे रद्द करण्यात आला. दरम्यान, साईनगर येथील प्रभाग क्रमांक 19- ड मधुन युवा स्वाभिमान पक्षाचे उमेदवार सचिन भेंडे हे उमेदवारी अर्ज रद्द होण्यापासून थोडक्यात वाचले. दोन्ही उमेदवारांनी आता उच्च न्यायालयात धाव घेतली आहे, त्यामुळे राजेश शादी यांनी निवडणुक निर्णय अधिकारी यांनी नामांकन अर्ज रद्द केल्यामुळे मुंबई हायकोर्टाच्या नागपूर खंडपीठात याचिका दाखल केली आहे. तर दुसरीकडे प्रभाग क्र.19 मधील उमेदवारी कायम असणारे युवा स्वाभिमानचे उमेदवार सचिन भेंडे यांनी आपल्या विरोधात घेतलेल्या आक्षेपावर नागपुर हायकोर्टात कॅवेट साठी धाव घेतली आहे. उल्लेखनिय असे की, प्रभाग क्र.18 राजापेठ, संत कंवरराम प्रभागातील ड जागेवर भाजपचे उमेदवार म्हणून तिकीट देण्यात आलेले राजेश शादी यांनी नामांकन अर्जासोबत दाखल केलेले मालमत्तेचे कागदपत्रात चुकीची माहिती देण्यात आली होती. असा आरोप करुन काँग्रेस उमेदवार मुन्ना राठोड यांनी निवडणूक निर्णय अधिकारी यांच्याकडे आक्षेप नोंदविली होता. त्यानंतर, निवडणूक निर्णय अधिकार्‍यांनी कागदपत्रांची तपासणी केल्यानंतर राजेश शादी यांच्याविरुद्धची तक्रार खरी असल्याचे आढळून आले आणि निवडणूक शपथपत्रात खोटी माहिती दिल्यामुळे त्यांचा उमेदवारी अर्ज रद्द करण्यात आले. हा निर्णय अयोग्य असल्यामूळे राजेश शादी यांनी आता त्यांच्या वकिलामार्फत मुंबई उच्च न्यायालयाच्या नागपूर खंडपीठात अपील दाखल केले आहे. राजेश शादी यांनी दाखल केलेल्या याचिकेवर नागपूर उच्च न्यायालय काय निर्णय देते याकडे आता सर्वांचे लक्ष लागले आहे. त्याचप्रमाणे, प्रभाग क्रमांक 19 मध्ये साईनगर ड-जागी निवडणूक लढवणारे युवा स्वाभिमान पक्षाचे उमेदवार सचिन भेंडे यांच्या दाव्याबाबत, त्याच जागेवरून निवडणूक लढवणारे भाजपचे उमेदवार तुषार भारतीय यांनी आक्षेप घेतला होता की, महानगरपालिका निवडणूक लढवण्यासाठी असा स्पष्ट नियम आहे की निवडणूक लढवणार्‍या उमेदवाराने निवडणुकीच्या तीन वर्षांपूर्वीपर्यंत कोणतेही कंत्राटी काम केलेले नसावे, परंतु युवा स्वाभिमान पक्षाचे उमेदवार सचिन भेंडे हे व्यवसायाने कंत्राटदार आहेत आणि अलिकडेपर्यंत महानगरपालिकेत काम करत होते. त्यामुळे सचिन भेंडे महानगरपालिका निवडणूक लढवण्यास अपात्र आहेत. त्यानंतर, वायएसपी उमेदवार सचिन भेंडे यांनी त्यांच्या वकिलामार्फत निवडणूक निर्णय अधिकार्‍यांसमोर आपले म्हणणे मांडले. यावरून असे सिध्द झाले की ते यापूर्वी कंत्राटीकरणात सहभागी असले तरी गेल्या तीन वर्षांत त्यांचे महानगरपालिकेशी कोणतेही व्यवहार नव्हते. परिणामी, ते निवडणूक लढवण्यास पूर्णपणे पात्र आहेत. परिणामी, निवडणूक निर्णय अधिकार्‍यांनी तुषार भारतीय यांचा आक्षेप रद्द केला आणि सचिन भेंडे यांची उमेदवारी कायम ठेवली. या निर्णयाविरुद्ध तुषार भारतीय गट नागपूर उच्च न्यायालयात याचिका दाखल करेल अशी दाट शक्यता असल्याने, सचिन भेंडेे यांनी त्यांच्या वकिलामार्फत नागपूर उच्च न्यायालयात कॅवेट दाखल केले आहे. दोन्ही प्रकरणांमध्ये उच्च न्यायालय काय भूमिका घेते हे पाहणे मनोरंजक ठरेल.