अपमानास्पद टोमण्यांना कंटाळून महिलेची आत्महत्या

अमरावती /3 डिसेंबर :  तू दिसण्यात सुंदर नाहीस, तुला स्वयंपाक करता येत नाही, माहेरहून काहीच आणले नाहीस, अशा अपमानास्पद टोमण्यांना कंटाळून 27 वर्षीय विवाहितेने गळफास घेऊन जीवनयात्रा संपविली. आसेगाव पूर्णा पोलीस ठाणे हद्दीत ही घटना घडली असून पोलिसांनी आरोपी पतीला अटक केली आहे. मृत विवाहितेचे नाव प्रणाली अक्षय वानखेडे (27, तळेगाव मोहणा) असे आहे. तर अटक झालेल्या आरोपीचे नाव अक्षय जीवनराव वानखेडे (भुगाव) असे आहे.
मिळालेल्या माहितीनुसार, प्रणालीचा विवाह तीन वर्षांपूर्वी अक्षयसोबत झाला होता. सुरुवातीचे दोन-तीन महिने पती आणि सासू यांचा तिच्याशी वागणूक चांगली होती. मात्र काही काळानंतर माहेरहून पैशांच्या मागणीवरून या दोघांनीही तिच्यावर मानसिक व शारीरिक छळ सुरू केला. प्रणालीचे वडील आर्थिकदृष्ट्या दुर्बल असल्याने अतिरिक्त पैसे देण्यास सक्षम नव्हते. त्यामुळे गेल्या दोन महिन्यांपासून आरोपी पती आणि सासू तिचा अधिक छळ करू लागले. या छळाला कंटाळून प्रणालीने 25 नोव्हेंबर रोजी माहेरी असताना, घरात कोणी नसताना गळफास घेतला. माहिती मिळताच आसेगाव पोलीस ठाण्याचे प्रभारी एपीआय सूरज तेलगोटे पथकासह घटनास्थळी पोहोचले. पंचनामा करून मृतदेह अचलपूर उपजिल्हा रुग्णालयात हलविण्यात आला. मुलीच्या अंत्यसंस्कारानंतर प्रणालीच्या वडिलांनी 1 डिसेंबर रोजी आसेगाव ठाण्यात तक्रार नोंदविली. तक्रारीच्या आधारे पोलिसांनी आरोपी पती आणि त्याची आई यांच्यावर संबंधित कायद्यान्वये गुन्हा नोंदवून पतीला अटक केली आहे. आरोपी सासूचा शोध सुरू असून पुढील तपास पोलीस करीत आहेत.
पिता यांनी दिले होते एक लाख रुपये -पिता आर्थिकदृष्ट्या दुर्बल असूनही मुलीचे संसार आयुष्य बिघडू नये म्हणून त्यांनी दोन महिन्यांपूर्वी आरोपी पती अक्षयला एक लाख रुपये दिले होते. तरीसुद्धा त्याचा वागणूक बदलला नाही. उलट पैशांच्या लालसेपोटी तो पत्नीवर अधिक दबाव टाकू लागला की तिने माहेरहून आणखी पैसे आणावेत.