पावसाचा परतीचा प्रवास, तरी राज्यात जोर कायम

-अमरावतीत पावसासह उष्णतेची झळ
नागपूर / 17 सप्टेंबर : नैऋत्य मान्सूनच्या परतीला हिरवा कंदील मिळाल्याची अधिकृत घोषणा हवामान विभागाने केली असली, तरी महाराष्ट्रात अजूनही पावसाची हजेरी कायम आहे. साधारणपणे 17 सप्टेंबरला सुरू होणारी मान्सूनची परतीची प्रक्रिया यंदा तीन दिवस अगोदर, म्हणजे 14 सप्टेंबरपासूनच पश्चिम राजस्थानमधून सुरू झाली. यानंतर मंगळवारी ती राजस्थानच्या इतर भागांबरोबरच गुजरात, पंजाब, हरियाणामधूनही पुढे सरकली आहे. पण, महाराष्ट्राच्या आकाशातून मात्र पावसाचे ढग साफ होण्याची गती मंदावली आहे.
राज्यात गेल्या आठवड्यापासूनच मुसळधार पावसाचा जोर सुरू असून, विदर्भ हा त्याचा केंद्रबिंदू ठरत आहे. नागपूरसह आसपासच्या जिल्ह्यांत दररोज विजांसह पावसाच्या सरी कोसळत आहेत. मंगळवारी नागपूरात अवघ्या तीन तासांत तब्बल 50 मिलिमीटर पाऊस पडला. अचानक कोसळलेल्या या पावसामुळे शहरातील अनेक भागांत रस्ते पाण्याखाली गेले. दरम्यान, अमरावतीत बुधवारी 33.4 अंश सेल्सिअस इतके उच्च तापमान नोंदले गेले. पावसाबरोबर उष्णतेची झळही कायम राहिल्याने नागरिकांना त्रास सहन करावा लागत आहे.
विदर्भावर कमी दाबाचे क्षेत्र निर्माण झाले असून, त्यासोबतच बंगालच्या उपसागरात नव्या प्रणालीचा प्रभाव दिसून येत आहे. यामुळेच महाराष्ट्रातून मान्सूनची माघार विलंबाने होते आहे. याशिवाय दक्षिण कर्नाटकपासून कोमोरिनपर्यंत उत्तर-दक्षिण कमी दाबाची रेघ तयार झाली आहे. या हवामान बदलामुळे कोकण, मध्य महाराष्ट्र, विदर्भ व मराठवाड्यात गेल्या आठवडाभरात जोरदार सरींचे प्रमाण वाढले आहे.
भारतीय हवामान विभागाने बुधवारी रत्नागिरी, सिंधुदुर्ग, बीड आणि अहमदनगर जिल्ह्यांत मुसळधार पावसाची शक्यता व्यक्त केली आहे. तर रायगड, पुणे, सातारा, सांगली, सोलापूर, छत्रपती संभाजीनगर, जालना, धाराशिव, लातूर, परभणी, हिंगोली, नांदेड, अमरावती, नागपूर, चंद्रपूर जिल्ह्यांत विजांसह पाऊस होईल, असा अंदाज आहे. या संदर्भात खात्याने सतर्कतेचा येलो अलर्ट जारी केला आहे.
-आठवडाभर पावसाचा मुक्काम
मान्सून परतीच्या मार्गावर असला तरी महाराष्ट्रात त्याचा मुक्काम त्वरित संपण्याची चिन्हे नाहीत. हवामान तज्ज्ञांच्या म्हणण्यानुसार पावसाचा ट्रेंड आणखी किमान आठवडाभर अनुभवायला लागणार आहे. त्यामुळे खरीप पिकांच्या दृष्टीने ही पर्जन्यवृष्टी फायदेशीर ठरेल. मात्र, अतिवृष्टी म्हणून ओळखल्या जाणार्‍या सरींमुळे शेतीसह जनजीवनावर दुष्परिणाम होऊ नयेत, याची काळजी घेणे आवश्यक आहे.