शहरातील तिघांची जिल्हा नियोजन समितीवर निवड

अमरावती/26 एप्रिल– राज्याच्या राजकारणात आणि स्थानिक विकास कामात महत्त्वाचे स्थान असलेल्या जिल्हा नियोजन समितीवर बडनेरा विधानसभा मतदारसंघातील तीन खंद्या समर्थकांची वर्णी लागली आहे. आ. रवी राणा यांच्या नेतृत्वाखाली कार्यरत असलेल्या विनोद जयस्वाल, आशिष कावरे आणि सुनील खराटे यांची सदस्यपदी निवड झाल्याने राजकीय वर्तुळात उत्साहाचे वातावरण पसरले असून, सर्वसामान्य जनतेतून या निवडीचे मोठ्या प्रमाणात स्वागत होत आहे.
जिल्ह्याचा विकास आराखडा तयार करणार्‍या या अत्यंत महत्त्वाच्या समितीवर बडनेरा मतदारसंघाचा शब्द आता अधिक प्रभावीपणे मांडला जाणार आहे. निवडून आलेल्या या तिन्ही सदस्यांनी आपल्या कामाच्या जोरावर जनमाणसात वेगळी ओळख निर्माण केली आहे. जिल्ह्याच्या सर्वांगीण प्रगतीसाठी आणि ग्रामीण भागातील प्रलंबित प्रश्न मार्गी लावण्यासाठी ही निवड मैलाचा दगड ठरणार आहे. या निवडीबद्दल बडनेरा विधानसभा मतदारसंघाचे आ. रवी राणा यांनी सर्व नवनियुक्त सदस्यांचे मनापासून अभिनंदन केले असून त्यांच्या पुढील वाटचालीस शुभेच्छा दिल्या आहेत. निवड झालेल्या सदस्यांच्या समर्थकांनी ठिकठिकाणी जल्लोष साजरा केला. गावागावात आणि शहरातील चौकाचौकांत फटाक्यांची आतषबाजी आणि पेढे वाटून आनंद व्यक्त करण्यात आला. जिल्हा नियोजन समितीच्या माध्यमातून आता ग्रामीण भागातील रस्ते, पाणी आणि वीज यांसारख्या मूलभूत सुविधांना अधिक गती मिळेल, अशी आशा सामान्य नागरिकांनी व्यक्त केली आहे. आ. रवी राणा यांच्या मार्गदर्शनाखाली हे तिन्ही सदस्य जिल्ह्याच्या विकासात मोलाची भर घालतील, असा विश्वास यानिमित्ताने व्यक्त होत आहे.