शहरात भटक्या कुत्र्यांचा हैदोस; मॉर्निंगवॉकलाही नागरिकांची भीती

अमरावती/13 सप्टेंबर : अमरावती शहरात भटक्या कुत्र्यांचा वाढता उपद्रव आता नागरिकांच्या जीविताच्या सुरक्षेसाठी गंभीर धोका ठरत आहे. शहरातील विविध भागांत दिवस-रात्र भटक्या कुत्र्यांची मोठमोठी टोळकी मुक्तपणे फिरताना दिसत असून, सकाळच्या वेळी मॉर्निंगवॉकसाठी घराबाहेर पडणार्‍या नागरिकांमध्ये भीतीचे वातावरण निर्माण झाले आहे.
दिल्ली पब्लिक स्कूल ते अकोली रोड या मार्गावर सध्या रस्त्याच्या मधोमध मोठ्या संख्येने भटक्या कुत्र्यांची टोळकी ठाण मांडून बसलेली असल्याचे चित्र समोर आले आहे. रस्त्यावरून जाणार्‍या नागरिक, दुचाकीस्वार अथवा पादचार्‍याच्या हालचालीकडे कुत्र्यांचे लक्ष गेले की अचानक भुंकणे, पाठलाग करणे आणि टोळक्याने त्या व्यक्तीभोवती जमा होण्याची परिस्थिती निर्माण होते. एका कुत्र्याने पाठलाग सुरू केला की इतर कुत्रीही त्याच्यामागे धावू लागतात. त्यामुळे विशेषतः ज्येष्ठ नागरिक, महिला, लहान मुले आणि दुचाकीस्वारांच्या सुरक्षेचा प्रश्न गंभीर झाला आहे. कुत्र्यांच्या भीतीने मॉर्निंगवॉक करणार्‍या नागरिकांनाही आपला नेहमीचा मार्ग बदलण्याची वेळ आली आहे.
24 तास कुठेही दिसू शकते अशी भयावह स्थिती -शहरातील केवळ एका रस्त्यापुरता हा प्रश्न मर्यादित नसून अनेक भागांत अशाच प्रकारे भटक्या कुत्र्यांची टोळकी दिसून येत आहेत. दिवसा रस्त्यावर आणि रात्री वस्तीच्या परिसरात कुत्र्यांचा वावर वाढल्याने नागरिकांमध्ये असुरक्षिततेची भावना निर्माण झाली आहे.भटक्या कुत्र्यांमुळे यापूर्वी घडलेल्या घटनांची जबाबदारी नेमकी कुणी घेतली, असा संतप्त सवाल नागरिकांकडून उपस्थित केला जात आहे. एखादी मोठी दुर्घटना घडल्यानंतरच प्रशासन जागे होणार का? असा प्रश्नही आता नागरिक विचारत आहेत.घटना घडण्यापूर्वी उपाययोजना करा; अन्यथा जनआंदोलनाचा इशारा नागरिकांच्या जीविताशी संबंधित हा प्रश्न प्रशासनाने गांभीर्याने घेऊन तातडीने ठोस उपाययोजना करावी, अशी मागणी होत आहे. भविष्यात भटक्या कुत्र्यांमुळे एखादी गंभीर घटना घडल्यास त्याची जबाबदारी निश्चित होणे आवश्यक आहे. नागरिकांच्या सुरक्षेचा प्रश्न दुर्लक्षित राहिल्यास मोठ्या स्वरूपाचे जनआंदोलन उभारले जाईल आणि त्यातून निर्माण होणार्‍या परिस्थितीची संपूर्ण जबाबदारी शासन व प्रशासनाची राहील, असा इशारा नागरिकांनी दिला आहे. आजची तारीख घेऊन न्यूजकार्ड बनव.