मुथूट घोटाळ्यात तीन किलो सोनं गायब

* कोट्यवधींचे नेटवर्क उघडकीस येण्याची शक्यता

अमरावती /13 ऑगस्ट- मुथूट फिनकॉर्प घोटाळ्याच्या तपासाला आता मोठे वळण मिळाले असून ग्राहकांचे गायब झालेले सोने आणि त्यामागील संपूर्ण नेटवर्क उघडकीस येण्याची शक्यता वाढली आहे. या प्रकरणात शाखा व्यवस्थापक आणि त्याच्या सहकार्‍यांची भूमिका समोर आल्यानंतर पोलिसांच्या तपासाचा रोख दोन फरार सराफांकडे वळला आहे. या आरोपींकडे ग्राहकांचे सुमारे तीन किलो सोने ठेवल्याचा संशय पोलिसांना असून, त्याची बाजारातील किंमत तीन कोटी रुपयांपेक्षा जास्त आहे. कोतवाली पोलिसांची पथके या दोघांचा शोध घेण्यासाठी विविध ठिकाणी छापे मारत आहेत.
या दरम्यान, पोलीस कोठडीत असलेल्या तीन आरोपींची रिमांड मुदत काल 13 ऑगस्ट रोजी संपल्याने कोतवाली पोलिसांनी तिघांना न्यायालयात हजर करण्याची तयारी केली आहे. तपास अधिकार्‍यांनुसार, या प्रकरणात मुख्य आरोपी शुभम वासेवाय आणि सहआरोपी सूरज खैरकर यांच्या उत्पन्नापेक्षा जास्त मालमत्तेची माहिती समोर आली आहे. यामुळे आरोपींना पुन्हा पोलीस कोठडी देण्याची मागणी केली जाऊ शकते. पोलीस तपासात समोर आले की, तत्कालीन व्यवस्थापक शुभम वासेवाय याने ग्राहकांचे गहाण सोने शहरातील चार वेगवेगळ्या सराफांकडे गहाण ठेवले होते. यातील दोन सराफांकडून 90 ग्राम सोने जप्त करण्यात आले आहे. मात्र, उर्वरित दोन सराफांकडे सुमारे तीन किलो सोने असून ते दोघे फरार आहेत. या फरार सराफांची चौकशी झाल्यास सोन्याच्या बदल्यात मिळालेली रक्कम कुठे खर्च करण्यात आली, याचा उलगडा होईल. तपासादरम्यान मिळालेल्या रकमेतून मालमत्ता खरेदी केल्याचे उघड झाले आहे. मुख्य आरोपी शुभम वासेवाय याने आपल्या वडिलांच्या नावाने कुर्‍हा परिसरात आठ एकर शेतजमीन खरेदी केली होती. तर सह-आरोपी सूरज अनिल खैरकर याने छांगानी नगर परिसरात सुमारे 75 ते 78 लाख रुपयांचा आलिशान बंगला खरेदी केला होता. पोलिसांनी या मालमत्तांची कागदपत्रे आणि दोन महागड्या गाड्या आधीच जप्त केल्या आहेत. या प्रकरणात पोलिसांनी शुभम वासेवाय, सूरज अनिल खैरकर आणि धिरज पंचमराव सिरसाट यांना अटक केली आहे. घोटाळा उघडकीस आल्यानंतर आतापर्यंत 60 तक्रारी दाखल झाल्या असून घोटाळ्याची व्याप्ती 4.75 कोटी रुपयांपर्यंत पोहोचली आहे. सध्या पोलिसांचा संपूर्ण तपास दोन फरार सराफ आणि तीन किलो सोन्यावर केंद्रित असून कोतवाली पोलीस फरार आरोपींचा शोध घेत आहेत.