पत्नी मोलकरीण नाही, जीवनसाथी : सुप्रीम कोर्ट

नवी दिल्ली/20 मार्च -सर्वोच्च न्यायालयाने शुक्रवारी घटस्फोटाशी संबंधित एका प्रकरणात म्हटले की, पत्नीने स्वयंपाक न करणे किंवा घरगुती कामे व्यवस्थित न करणे याला क्रूरता मानले जाऊ शकत नाही.
तुम्ही मोलकरणीशी नाही, तर जीवनसाथीशी लग्न करत आहात. न्यायमूर्ती संदीप मेहता आणि न्यायमूर्ती विक्रम नाथ यांच्या न्यायासनाने म्हटले- आता काळ बदलला आहे आणि पतीलाही घरगुती कामांमध्ये समान जबाबदारी पार पाडावी लागेल. आजच्या काळात पतीनेही स्वयंपाक करावा आणि घरची कामे करावीत. न्यायालयाने या प्रकरणात अंतिम निर्णय दिलेला नाही. पुढील सुनावणीच्या तारखेला पती-पत्नीला वैयक्तिकरित्या हजर राहण्यास सांगितले आहे. दोघांचे लग्न 2017 मध्ये झाले होते आणि त्यांना आठ वर्षांचा एक मुलगा आहे. पती सरकारी शाळेत शिक्षक आहे, तर पत्नी लेक्चरर आहे. युक्तिवादानुसार, पत्नी आर्थिकदृष्ट्या पतीपेक्षा चांगल्या स्थितीत आहे आणि तिने आतापर्यंत कोणत्याही प्रकारची पोटगी किंवा भत्ता मागितलेला नाही.पतीचा आरोप आहे की, लग्नाच्या एका आठवड्यानंतरच पत्नीचे वर्तन बदलले. ती त्याच्याशी चुकीच्या पद्धतीने वागू लागली आणि त्याच्या तसेच त्याच्या आई-वडिलांविरुद्ध अपशब्द वापरत असे. तिने घरचे जेवण बनवण्यासही नकार दिला.