अदिती स्वामीची अंतिम फेरीत धडक; सुवर्णपदकाची संधी
आशियाई स्पर्धेत भारतीय तिरंदाजांची पदकांची लयलूट

थिरुमुरूची थरारक विजयासह अंतिम फेरीत प्रवेश; भारताची पदकांची आशा बळावली
अमरावती/19 नोव्हेंबर – हांगझोऊ चीनमध्ये सुरू असलेल्या आशियाई चषक तिरंदाजी स्पर्धेत भारतीय खेळाडूंनी दमदार कामगिरी करत देशासाठी पदकांच्या आशा उंचावल्या आहेत. महाराष्ट्राच्या सातार्यातील अदिती स्वामी आणि गणेश मणी रत्नम थिरुमुरू यांनी वैयक्तिक गटाच्या अंतिम फेरीत प्रवेश केला असून, दोघांनाही सुवर्णपदक जिंकण्याची संधी मिळाली आहे. थिरुमुरूने उपांत्य फेरीत चीनच्या क्यूई बिहेंगचा 146-146 अशा बरोबरीनंतर झालेल्या नेमबाजीच्या निर्णायक फेरीत पराभव केला. तर अदितीने दक्षिण कोरियाच्या ओह युहूनला 149-142 असे नमवत अंतिम फेरी गाठली. यामुळे भारताच्या पदकांच्या खात्यात आणखी भर पडण्याची शक्यता निर्माण झाली आहे.
पुरुषांच्या संयुक्त धनुर्विद्या वैयक्तिक गटात गणेश मणी रत्नम थिरुमुरू याने अत्यंत चुरशीच्या लढतीत विजय मिळवला. चीनच्या क्यूई बिहेंगविरुद्ध निर्धारित फेरीत दोघांचेही गुण 146-146 असे समान झाले. त्यामुळे विजेता ठरवण्यासाठी निर्णायक नेमबाजी घेण्यात आली. त्यात थिरुमुरूने 10 पेक्षा अधिक गुणांचा अचूक वेध घेतला, तर चिनी खेळाडूला 10 गुणांवर समाधान मानावे लागले. आता शनिवारी सुवर्णपदकासाठी त्याचा सामना ऑस्ट्रेलियाच्या वाइल्डरमॅन बेली याच्याशी होणार आहे. बेलीने दुसर्या उपांत्य फेरीत भारताच्या सचिन चेचीचा 149-146 असा पराभव केला. सचिनचा कांस्यपदकासाठी चीनच्या क्यूई बिहेंगशी सामना होईल. महिलांच्या संयुक्त धनुर्विद्या वैयक्तिक गटात सातार्याच्या अदिती स्वामीनेही आपली ताकद दाखवून दिली. प्रशिक्षक प्रवीण सावंत यांच्या मार्गदर्शनाखाली खेळणार्या अदितीने चिनी तैपेई, चीन आणि दक्षिण कोरियाच्या खेळाडूंना मागे टाकत अंतिम फेरीत प्रवेश केला. उपांत्य फेरीत तिने ओह युहूनला 149-142 असे हरवले. यापूर्वी उपांत्यपूर्व फेरीत तिची लढत कोरियाच्या किम सुयोनशी झाली होती. दोघींचे गुण 145-145 असे समान झाल्यानंतर निर्णायक नेमबाजीत अदितीने 10-9 असा विजय मिळवला. आता शनिवारी सुवर्णपदकासाठी तिची लढत चीनच्या हू जिंगवेनशी होणार आहे. दरम्यान, पुण्याच्या पृथिका प्रदीपनेही चांगली कामगिरी केली. तिने सौदी अरेबिया आणि इंडोनेशियाच्या खेळाडूंना पराभूत करत उपांत्य फेरी गाठली. मात्र, चीनच्या हू जिंगवेनने तिचा 149-145 असा पराभव केला. त्यामुळे पृथिकाला आता कांस्यपदकासाठी दक्षिण कोरियाच्या ओह युहूनशी लढावे लागणार आहे. भारतीय खेळाडूंच्या या कामगिरीमुळे स्पर्धेतील सुवर्ण आणि कांस्यपदकाच्या आशा अधिक मजबूत झाल्या आहेत.





