दिवाळीपूर्वी एसटी कर्मचार्‍यांसाठी शासनाकडून 391 कोटींचा निधी मंजूर
मुंबई /27 ऑक्टोबर : दिवाळी सणाच्या पार्श्वभूमीवर राज्य सरकारने महाराष्ट्र राज्य मार्ग परिवहन महामंडळाला (एसटी) मोठा दिलासा दिला आहे. एसटी कर्मचार्‍यांचे वेतन दिवाळीपूर्वी व्हावे, यासाठी राज्य शासनाने मंगळवारी 391.02 कोटी रुपयांचा निधी वितरित करण्याचा शासन निर्णय जारी केला आहे.
परिवहन मंत्री आणि एसटी महामंडळाचे अध्यक्ष प्रताप सरनाईक यांनी महामंडळातील सुमारे 83 हजार अधिकारी व कर्मचार्‍यांचे वेतन सणापूर्वी त्यांच्या खात्यात जमा करण्याचे निर्देश प्रशासनाला दिले आहेत. महामंडळाकडे 15 हजारांपेक्षा जास्त गाड्यांचा ताफा असून दररोज सुमारे 55 लाखांहून अधिक प्रवासी एसटीने प्रवास करतात. सप्टेंबर महिन्यातच या निधीला मंजुरी मिळाली होती, मात्र त्याचा अधिकृत शासन निर्णय मंगळवारी प्रसिद्ध करण्यात आला. कर्मचार्‍यांना सहसा दरमहा 7 ते 10 तारखेदरम्यान वेतन मिळते. यंदा 6 नोव्हेंबरपासून दिवाळी सुरू होत असल्याने पगार त्वरित अदा करण्याचे आदेश देण्यात आले आहेत. आर्थिक अडचणींमुळे कर्मचार्‍यांची दिवाळी अंधारात जाऊ नये, यासाठी शासन व महामंडळाने समन्वयाने काम करावे, असे सरनाईक यांनी स्पष्ट केले.
