वास्तुकला क्षेत्र : करिअरची एक सोनेरी संधी

अमरावती/28एप्रिल: अमरावतीच्या पी. आर. पोटे पाटील कॉलेज ऑफ आर्किटेक्चरमध्ये नुकतेच ’वास्तुकला’ विषयावर एक विशेष मार्गदर्शन सत्र उत्साहात पार पडले. या चर्चासत्रात वास्तुकला हे केवळ सिमेंट-काँक्रिटचे बांधकाम नसून ती कला, विज्ञान आणि समाजसेवेचा एक अत्यंत सुंदर आणि अनोखा संगम असल्याचे स्पष्ट करण्यात आले. महाविद्यालयातील प्राध्यापकांच्या उपस्थितीत पार पडलेल्या या सत्रात वास्तुकला क्षेत्रातील विविध संधी आणि भविष्यातील आव्हानांवर सविस्तर चर्चा करण्यात आली.
वास्तुकला हे क्षेत्र आजच्या पिढीसाठी अत्यंत आश्वासक आणि भविष्यवेधी आहे. प्रा. हरे निगोसकर यांनी उपस्थितांना मार्गदर्शन करताना सांगितले की, आपली कल्पनाशक्ती वापरून नवनवीन डिझाईन्स साकारणे आणि मानवी जीवनाला सोयीस्कर ठरतील अशा वास्तूंची निर्मिती करणे, यातच या क्षेत्राचे यश दडलेले आहे. आजच्या आधुनिक काळात टू-डी, थ्री-डी डिझाईन आणि बिल्डिंग इन्फॉर्मेशन मॉडेलिंगसारख्या अत्याधुनिक तंत्रज्ञानाचा वापर करून विद्यार्थी आपल्या कामाला एक नवी उंची देऊ शकतात. केवळ इमारती उभा करणे म्हणजे वास्तुकला नव्हे, तर पर्यावरण संवर्धन आणि समाजाची गरज ओळखून त्याचे नियोजन करणे म्हणजे खरे कौशल्य आहे. या क्षेत्रात करिअरच्या अनंत वाटा खुल्या आहेत, ज्यामध्ये इंटीरियर डिझायनर, अर्बन प्लॅनर, आणि लँडस्केप आर्किटेक्ट म्हणून विद्यार्थी स्वतःची ओळख निर्माण करू शकतात. विशेषतः सौरऊर्जेचा वापर, पाणी बचत आणि हरित वास्तुकलेचे (ग्रीन आर्किटेक्चर) महत्त्व आजच्या काळात अधिक वाढले आहे. महाविद्यालयाचे प्राचार्य प्रा. संजय देशमुख यांनी विद्यार्थ्यांना या क्षेत्राकडे वळण्याचे आवाहन करत सांगितले की, ही संधी सोन्यासारखी आहे.