अमरावतीत 130 कोटीच्या रेल्वे पुलाचे काम लवकरच

नागरिकांची रोजची मोठी डोकेदुखी मिटणार

अमरावती/11 सप्टेंबर- शहरातील मध्यवर्ती रेल्वे स्थानकाचा जुना पूल पाडल्यापासून अमरावतीकरांचे पुरते हाल बेहाल होत असून, ही रोजची कटकट कायमची संपवण्यासाठी येत्या ऑक्टोबर महिन्यात प्रत्यक्ष कामाचा नारळ फुटणार आहे. भविष्यातील रेल्वे मार्गांचा विस्तार आणि शहराला भिडणारे मुख्य जोड रस्ते ध्यानात ठेवून हे काम सुसाट गतीने पूर्ण करण्यात येईल, अशी रोखठोक ग्वाही सार्वजनिक बांधकाम मंत्री शिवेंद्रराजे भोसले यांनी घटनास्थळाची पाहणी करून दिली. मध्यवर्ती स्थानकावरील जीर्ण झालेला रेल्वे पूल जमीनदोस्त झाल्यामुळे आजूबाजूच्या हजारो अमरावतीकरांचा जीव अक्षरशः टांगणीला लागला आहे. दैनंदिन ये-जा करण्यासाठीलांब पल्ल्याचा वळसा घालावा लागत असल्याने लोकांचे प्रचंड हाल होत होते. या त्रासाची थेट दखल घेत सार्वजनिक बांधकाम मंत्री शिवेंद्रराजे भोसले यांनी प्रत्यक्ष घटनास्थळी धाव घेऊन परिस्थितीचा कानोसा घेतला. येत्या ऑक्टोबरपासून या पुलाच्या बांधकामाला पूर्ण ताकदीने सुरुवात होणार असून अमरावतीकरांची ही मोठी डोकेदुखी लवकरात लवकर दूर केली जाईल, असा शब्द त्यांनी दिला. या पाहणी दौर्‍यात आ. सुलभा खोडके, राजेश वानखडे, संजय खोडके, आ. प्रवीण पोटे, महारेलचे सह महाव्यवस्थापक संग्राम पाटील, सार्वजनिक बांधकाम प्रादेशिक विभागाच्या मुख्य अभियंता सुषमा बोंद्रे यांच्यासह अनेक वरिष्ठ अधिकारी तळ ठोकून होते.विधिमंडळाच्या अधिवेशनात अमरावतीच्या या रेल्वे पुलाचा प्रश्न चांगलाच गाजला होता. लोकभावना ओळखून राज्य शासनाने लगेच कामाला हिरवा कंदील दाखवला. पालकमंत्री चंद्रशेखर बावनकुळे यांनी मंत्रालयात सतत पाठपुरावा लावून धरत या प्रकल्पासाठी थेट राज्याच्या अर्थसंकल्पातून तब्बल 130 कोटी रुपयांची भक्कम तरतूद करून निधी मंजूर करवून आणला. राज्यातील रेल्वे पुलांची कामे जलद गतीने मार्गी लावण्यासाठी मुख्यमंत्री देवेंद्र फडणवीस यांनी ही कामे थेट महारेलकडे सोपवण्याचा निर्णय घेतला आहे.महारेलने या पुलाची निविदा प्रक्रिया आणि जमिनीवरील तांत्रिक तयारी आता शेवटच्या टप्प्यात आणून ठेवली आहे. केवळ तात्पुरती मलमपट्टी न करता भविष्यातील रेल्वे विस्तार आणि शहराला जोडणारे पोहोच रस्ते यांचा पक्का आराखडा तयार करण्यात आला आहे. पुलाचे काम सुरू झाल्यावर लोकांची आणखी कोंडी होऊ नये यासाठी काम झटपट पूर्ण करण्याच्या सूचना देण्यात आल्या आहेत. ऑक्टोबरपासून प्रत्यक्ष काम दिसू लागेल आणि अमरावतीकरांची रखडलेली अडचण कायमची निकालात निघेल.
130 कोटींच्या निधीतून आधुनिक पूल-जुना पूल पाडल्याने अमरावतीकरांचे दैनंदिन हाल सुरू आहेत. पालकमंत्री चंद्रशेखर बावनकुळे यांच्या सातत्यपूर्ण प्रयत्नांतून शासनाने 130 कोटी रुपयांचा निधी तात्काळ मंजूर केला. महारेल कंपनीच्या देखरेखीखाली आधुनिक तंत्रज्ञानाचा वापर करून ऑक्टोबरपासून हा नवा पूल वेगाने उभारला जाणार असून भविष्यातील वाहतुकीचा ताण कायमचा निकालात निघेल.