विवाहाचे आमिष दाखवून महिलेवर अत्याचार

* धारणी परिसरात संतापजनक कृत्याप्रकरणी दोघांवर गुन्हे दाखल

अमरावती / 12 जानेवारी : विवाहाचे खोटे आश्वासन देऊन एका 31 वर्षीय महिलेचा लैंगिक छळ केल्याची आणि तिच्या विवस्त्र छबी समाजमाध्यमावर प्रसारित करून तिची बदनामी केल्याची धक्कादायक घटना धारणी परिसरात उघडकीस आली आहे. या प्रकरणी पीडितेच्या तक्रारीवरून पोलिसांनी दोन तरुणांविरुद्ध कठोर कलमान्वये गुन्हे नोंदवून सखोल तपास चक्रांना वेग दिला आहे. मेलघाटच्या चिखलदरा येथील अमन राजेश शेलेकर याने पीडितेशी प्रेमसंबंध प्रस्थापित करून तिला लग्नाचे स्वप्न दाखवले. या आमिषाला बळी पाडून त्याने 1 ऑक्टोबर 2023 पासून पीडितेच्या घरात शिरून तिची वारंवार शारीरिक विटंबना केली. हा अत्याचार 30 डिसेंबर 2025 पर्यंत सुरू होता. या संतापजनक घटनेत आयुष सोहम मेटकर याने पीडितेची आक्षेपार्ह छायाचित्रे काढून ती इंटरनेटवर प्रसारित केल्याचे समोर आले आहे. स्वतःची फसवणूक आणि बदनामी झाल्याचे लक्षात येताच पीडितेने रविवारी धारणी पोलीस ठाण्यात धाव घेऊन आपबिती सांगितली. पोलिसांनी या दोन्ही नराधमांविरुद्ध भारतीय न्याय संहिता आणि माहिती तंत्रज्ञान कायद्यान्वये गुन्हे नोंदवले असून पोलीस या गंभीर प्रकरणाचा पुढील तपास करत आहेत.
नराधमांचे संतापजनक कृत्य व कायदेशीर कारवाई -विवाहाचे प्रलोभन दाखवून महिलेचे शोषण करणारा अमन राजेश शेलेकर आणि अश्लील छायाचित्रे काढून ती सर्वत्र प्रसारित करणारा आयुष सोहम मेटकर या दोघांविरुद्ध पोलिसांनी गंभीर गुन्हे नोंदवले आहेत. या विकृत कृत्यामुळे परिसरात तीव्र संताप व्यक्त होत असून गुन्हेगारांना कठोर शिक्षा देण्याची मागणी होत आहे.