उष्णता व दमट वातावरणामुळे जनजीवन विस्कळीत

विदर्भात उन्हाचा पारा चाळीशीपार
पुढील दोन दिवस उष्णतेची लाट

अमरावती/13 मे- पश्चिम विदर्भासह संपूर्ण महाराष्ट्र सध्या सूर्याच्या प्रकोपाने होरपळून निघत असून आकाशातून जणू आगीचे गोळे बरसत असल्याचा भास होत आहे. अमरावती आणि अकोला जिल्ह्यात उष्णतेची तीव्र लाट उसळली असून तापमानाने उच्चांक गाठला आहे. अकोला शहर राज्यात सर्वात उष्ण ठरले असून त्यापाठोपाठ अमरावतीचा क्रमांक लागत असल्याने नागरिकांचे हाल होत आहेत. हवामान विभागाने पुढील दोन दिवस उष्णतेची लाट कायम राहण्याचा इशारा दिला असून प्रशासनाने नागरिकांना दुपारच्या वेळी काळजी घेण्याचे आवाहन केले आहे. वाढत्या उन्हामुळे दवाखान्यांमध्ये उष्माघाताच्या रुग्णांची गर्दी वाढत असून जनजीवन पूर्णपणे विस्कळीत झाले आहे.
विदर्भाच्या मातीत सध्या उन्हाचा चटका इतका वाढला आहे की, रणरणत्या उन्हात घराबाहेर पडणे कठीण झाले आहे. अकोल्यात तापमानाचा पारा 46 अंशांच्या जवळ पोहोचला असून अमरावतीत 45.6 अंश तापमानाची नोंद झाली आहे. एप्रिल महिन्यासारखीच स्थिती आता मे महिन्यातही पाहायला मिळत असून सूर्याची आग अंगाची लाहीलाही करत आहे. केवळ विदर्भच नव्हे तर मराठवाडा आणि पश्चिम महाराष्ट्र देखील उन्हाच्या तडाख्यात सापडले आहेत. मराठवाड्यातील बीड, परभणी आणि धाराशिव जिल्ह्यात तापमान 43 अंशांच्या पुढे गेले आहे, तर पश्चिम महाराष्ट्रातील कोल्हापूर, सोलापूर, सांगली आणि सातारा या जिल्ह्यांतही उष्णतेची तीव्रता वाढली आहे. राज्याच्या अनेक भागात तापमानाचे नवनवे विक्रम प्रस्थापित होत असल्याचे चित्र दिसत आहे. हवामान विभागाने दिलेल्या माहितीनुसार, सुरुवातीला तीन दिवसांचा इशारा देण्यात आला होता, परंतु आता त्यामध्ये आणखी एका दिवसाची वाढ करण्यात आली आहे. वाढत्या तापमानामुळे शरीरातील पाण्याचे प्रमाण कमी होऊन उष्माघाताचा धोका वाढला आहे. जिल्हा सामान्य रुग्णालय आणि खासगी दवाखान्यांमध्ये दररोज 300 पेक्षा अधिक रुग्ण दाखल होत आहेत. विशेषतः लहान मुले आणि वृद्धांना उन्हाचा मोठा फटका बसत आहे. रस्त्याच्या कडेला राहणारे निराधार लोकही या उष्णतेचे बळी ठरत असून आरोग्य विभागाने सतत पाणी पिण्याचा आणि थंड पेयांचे सेवन करण्याचा सल्ला दिला आहे. दुपारी 12 ते 4 या वेळेत काम नसेल तर घराबाहेर पडू नका, अशा कडक सूचना डॉक्टरांनी दिल्या आहेत. उन्हाच्या या तडाख्याने सर्वत्र त्राहीमाम अशी परिस्थिती निर्माण झाली आहे. गेल्या एप्रिल महिन्यातही अकोला आणि अमरावती ही शहरे देशातील सर्वात उष्ण शहरांच्या यादीत होती. आता मे महिन्यातही तीच स्थिती कायम असून तापमानाने ऐतिहासिक झेप घेतली आहे. ठिकठिकाणी उष्णतेचे विशेष कक्ष कार्यान्वित करण्यात आले असून वाढत्या गर्दीमुळे आरोग्य यंत्रणेवर मोठा ताण येत आहे.
तापमान नोंद : अकोला 45.6, अमरावती 45.4, बुलढाणा 43.5, वाशिम 43.4, यवतमाळ 41.8, नागपूर 43, वर्धा 44.2, चंद्रपूर 42.2, गडचिरोली 41.4, अहिल्यानगर 43, संभाजीनगर 43.6, बीड 44, जळगाव 45.5, कोल्हापूर 38.7, मालेगाव 43.8, नाशिक 41.2, परभणी 43.1, धाराशिव 40.8, सांगली 44.4, सातारा 41.7, सोलापूर 41.8.
आरोग्याची काळजी घेणे काळाची गरज-वाढत्या तापमानात स्वतःला सुरक्षित ठेवण्यासाठी सुती कपड्यांचा वापर करा आणि भरपूर पाणी प्या. उन्हात जाताना डोके झाकून ठेवावे. उष्माघाताची लक्षणे दिसताच त्वरित डॉक्टरांचा सल्ला घ्यावा. आपली सतर्कता आणि खबरदारीच आपल्याला या तीव्र उष्णतेच्या लाटेपासून वाचवू शकते. स्वस्थ रहा आणि सुरक्षित रहा.