लाडकी बहीण योजना सुरुच राहणार

* अचलपुरच्या सर्वांगीण विकासासाठी नगरपरिषदेत भाजपची सत्ता गरजेचे

परतवाडा/27 नोव्हेंबर – अचलपुर नगरपरिषद निवडणूक प्रचाराला सुरूवात होताच राजकीय वातावरण तापू लागले असून या पार्श्वभूमीवर राज्याचे पालकमंत्री चंद्रशेखर बावनकुळे यांनी मतदारांशी थेट संवाद साधत महत्त्वाची हमी दिली. अचलपुरातील प्रचारसभेत बोलताना त्यांनी लाडली बहन योजना कोणत्याही परिस्थितीत बंद होणार नसून पात्र लाभार्थींना मासिक लाभ शासकीय नियमांनुसार नियमित मिळत राहणार असल्याचे स्पष्ट केले. योजनेबाबत अफवा निर्माण करून नागरिकांना संभ्रमात टाकण्याचा प्रयत्न काहीजण करत आहेत; परंतु या योजनेला कोणताही धोका नाही, असे ते म्हणाले.
बावनकुळे म्हणाले की, अचलपुरच्या विकासासाठी निधी व योजना पुरेशा प्रमाणात उपलब्ध आहेत; फक्त सक्षम आणि विकासाभिमुख सत्तेची गरज आहे. नगराध्यक्ष पदाच्या भाजप उमेदवार रुपाली माधने यांच्यासह सर्व उमेदवारांना पाठिंबा देत त्यांनी मतदारांना स्थिर प्रशासनासाठी मतदान करण्याचे आवाहन केले. केंद्र आणि राज्य शासनाच्या योजना तळागाळापर्यंत पोहोचाव्यात, यासाठी स्थानिक संस्थांमध्ये भाजपा सत्ता आवश्यक आहे, असेही त्यांनी अधोरेखित केले.
सभेला मोठ्या संख्येने उपस्थित असलेल्या नागरिकांसमोर झालेल्या या कार्यक्रमात संसदीय क्षेत्रातील प्रमुख नेतेही दाखल झाले होते. खासदार अनिल बोडे, माजी खासदार नवनीत राणा, आमदार प्रवीण तायडे यांची उपस्थिती सभेला वेगळे महत्त्व देणारी ठरली.
सभेत बोलताना आमदार प्रवीण तायडे यांनी अचलपुरातील वातावरण भाजपाच्या बाजूने असल्याचा दावा करत आगामी निवडणूक एकतर्फी होईल असा विश्वास व्यक्त केला. त्यांनी नगरपरिषद सत्तेत आल्यानंतर प्रलंबित पीआर कार्डांचे वितरण गतीमान करण्याचा शब्द दिला. तसेच शहरातील वाढत्या अवैध बांधकामांवर कठोर कारवाई करून नागरिकांचा त्रास कमी करण्याचे आश्वासनही त्यांनी दिले. शहरातील शिस्त आणि सुविधा हा आमचा मुख्य हेतू असेल, असे ते म्हणाले. माजी खासदार नवनीत राणा यांनीही भाषणात ठाम आणि जोरदार भूमिका मांडली. त्यांनी समाजात परस्परांतील एकतेचे महत्त्व अधोरेखित करत नागरिकांना सावध आणि जागरूक राहण्याचे आवाहन केले. त्यांच्या आक्रमक भूमिकेची चर्चा सभेनंतरही सुरू राहिली.
यावेळी प्रहार पक्षातील अनेक पदाधिकार्‍यांनी भाजपा प्रवेश केला. या प्रवेशामुळे भाजपाची ताकद आणखी वाढल्याचे स्थानिक नेत्यांनी सांगितले. कार्यकर्त्यांच्या उत्साहात वाढ झाल्याचे चित्र सभेमध्ये स्पष्ट दिसून आले. कार्यक्रमाचा समारोप आमदार प्रवीण तायडे यांच्या आभार प्रदर्शनाने झाला. अचलपुरच्या पुढील पाच वर्षांच्या विकासाचा आराखडा भाजप सत्तेत आल्यानंतर स्पष्टपणे समोर येईल, अशी भावना कार्यकर्त्यांमध्ये दिसत असून प्रचाराचा झंझावात आता आणखी वेग घेण्याची चिन्हे स्पष्ट झाली आहेत.