अमरावतीत येणार्‍या व्यावसायिकाला लुटले

* पोलिसांची तत्परता, 56 लाखाचा माल जप्त
* दिवाळीच्या काळात सोन्याचे व्यापारी टार्गेट

अमरावती /14 ऑक्टोंबर – दिवाळीच्या काळात सोने व्यापारी एकामागून एक चोरट्यांचे लक्ष्य बनत आहेत. रविवारी संध्याकाळी बडनेरा स्थानकावरून एका सोने व्यापार्‍याची 2 कोटी रुपयांची बॅग गायब झाल्यानंतर आता अमरावतीला येणारे व्यापारी प्रदीप कुमार धरमपाल सिंग (दादर पूर्व, मुंबई) यांना लुटण्यात आले. त्यांच्या काळ्या बॅगेत तब्बल 56 लाख रुपयांचे सोने होते. नाशिक रोड पोलिसांनी तातडीने कारवाई करत आरोपी राधे गज्जू बिसोने (वय 30, रा. गडगोहन, पोलीस स्टेशन झल्लर, तहसील भैसदेही) याला अटक केली आणि चोरीचा माल जप्त केला. माहितीनुसार, व्यापारी प्रदीप कुमार अमरावतीला डिलिव्हरीसाठी माल घेऊन जात होते. त्यांनी पोलिसांना सांगितले की, ते दिवाळीचा माल पाच सराफा व्यापार्‍यांना पोहोचवणार होते. हावडा मेल ट्रेनच्या एस-4 कोचमध्ये प्रदीप सिंग झोपलेले असताना, आरोपी राधे गज्जू बिसोनेने त्यांच्या काळ्या बॅगेची चोरी केली. त्या बॅगेमध्ये 56.68 लाख रुपयांचे सोन्याचे दागिने होते. नाशिक रोड पोलिसांच्या स्वाती भोर यांनी तातडीने कारवाई करत आरोपीला अटक केली आणि सर्व चोरीचा माल जप्त केला. या कारवाईत प्रभारी अधिकारी सचिन बनकर, संतोष उपाडे, शैलेंद्र पाटील, राज बच्छाव, नवीन प्रताप सिंग, अंबिका यादव, मच्छिंद्र लांडगे, गौतम बिर्हाडे, सुनील गडाख, सागर वर्मा, मनीष कुमार आणि के.के. यादव यांनी सहभाग घेतला.