वीज पडून चार महिला जखमी, दोघींची प्रकृती गंभीर

* गंभीर महिलांना नागपूरमध्ये हलविले

धामणगाव रेल्वे/26 सप्टेंबर : तालुक्यातील हिरापूर गावात शुक्रवारी दुपारी अचानक आलेल्या वादळात शेतात वीज कोसळून चार महिला जखमी झाल्या. जखमींपैकी दोन महिला गंभीर जखमी असून त्यांना नागपूर येथे रेफर करण्यात आले आहे. इतर दोन महिलांना प्राथमिक उपचारानंतर घरी पाठविण्यात आले आहे. गंभीर जखमी झालेल्या महिलांमध्ये पिंकी प्रमोद बनसोड (40) आणि मीना नामदेव आत्राम (35) यांचा समावेश आहे. माहितीनुसार हिरापूर चौरे या गावातील रहिवासी असलेल्या शेतात महिला काम करत असताना दुपारी अचानक वादळी वार्‍यासह मुसळधार पाऊस सुरू झाला. वीज कोसळून पिंकी बनसोड (40), मीना आत्राम (35), शारदा प्रवीण कुटेमाटे (30) आणि नंदा दिलीप ठाकरे (30) या जखमी झाल्या. चारही जखमी महिलांना धामणगाव रेल्वे सरकारी रुग्णालयात तात्काळ आणण्यात आले. प्राथमिक उपचारानंतर शारदा कुटेमाटे आणि नंदा ठाकरे यांची प्रकृती बरी असल्याने त्यांना घरी सोडण्यात आले. तथापि, पिंकी बनसोड आणि मीना आत्राम यांची प्रकृती गंभीर असल्याने त्यांना नागपूर सरकारी रुग्णालयात रेफर करण्यात आले. या घटनेमुळे हिरापूर गावात भितीचे वातावरण पसरले असून सुरक्षेच्या दृष्टीने पावसाळ्यात सर्वांना सतर्क राहण्याचे आवाहन प्रशासनाने केले आहे.