मद्यपी युवकाची गळफास घेउन आत्महत्या

अमरावती / 22 मे: दारुच्या व्यसनाच्या आहारी गेलेल्या युवकाने आपल्या राहत्या घरी गळफास लावून आत्महत्या केल्याची घटना खोलापुरी गेट पोलिस ठाण्याच्या हद्दीत माळीपूरा परिसरात घडली. अर्पण दीलीप गणोस्कर (25) असे मृतक युवकाचे नाव आहे.
अर्पण हा आपला मोठा भाउ मेघराज याच्यासह माळीपूरा परिसरात वास्तव्यास होता. दोन्ही भावांना दारुचे व्यसन होते. अर्पणने मंगळवारी रात्री आपल्या राहत्या घरी छताच्या पंख्याला दुपट्टा बांधून त्याद्वारे स्वत:ला गळफास लावला आणि आत्महत्या केली. मेघराज घरी आला तेव्हा ही घटना उघडकीस आली. याबाबत शेजारी राहणारा अर्पणचा चुलत भाउ विक्की गणोस्कर याने खोलापुरी गेट पोलिसांना माहिती दिली. पोलिसांनी घटनास्थळी जावून मृतदेह उत्तरीय तपासणीसाठी रुग्णालयात पाठविला आणि पंचनामा केला. याप्रकरणी अकस्मात मृत्युची नोंद करण्यात आली आहे.