अमरावती एक्सप्रेस आता वेळाने सुटणार

नागपूर दुरांतो आणि महानगरी एक्सप्रेसच्या वेळेतही रेल्वेकडून सुधारणा

अमरावती /27 फेब्रुवारी : रेल्वेने प्रवास करणार्‍या माझ्या तमाम भावंडांसाठी एक महत्त्वाची खबर आहे. गाड्यांच्या येण्या जाण्याच्या वेळेत रेल्वे प्रशासनाने मोठा फेरबदल केला असून अनेक गाड्यांचे थांबेही बदलले आहेत. विशेषतः मुंबईला जाणार्‍या आणि येणार्‍या गाड्यांच्या वेळेत हा बदल करण्यात आला आहे. आता आपली लाडकी मुंबई अमरावती एक्सप्रेस रात्री आठ पाच ऐवजी आठ वाजून पन्नास मिनिटांनी मुंबईवरून सुटेल. 14 एप्रिलपासून हा नवा नियम लागू होणार असून यामुळे ठाणे कल्याण आणि इगतपुरीला जाणार्‍या प्रवाशांच्या वेळेतही बदल झाला आहे. ठाण्याला ही गाडी रात्री नऊ वाजून सतरा मिनिटांनी तर कल्याणला नऊ वाजून सत्तेचाळीस मिनिटांनी पोहोचेल.
विदर्भाची शान असलेली नागपूर दुरांतो एक्सप्रेस आता रात्री सात वाजून पंचावन्न मिनिटांऐवजी आठ वाजून पस्तीस मिनिटांनी सुटणार आहे. तसेच दादरहून सुटणारी हुबळी एक्सप्रेस दहा मिनिटे आधी म्हणजेच रात्री आठ वाजून पाच मिनिटांनी सुटेल. सकाळी सुटणारी बंगळुरू एक्सप्रेस देखील पंधरा मिनिटे लवकर म्हणजेच सात वाजून पंचावन्न मिनिटांनी रवाना होईल. मुंबईत येणार्‍या गाड्यांच्या वेळेतही 5 ते 15 मिनिटांचा फरक पडला आहे. नागपूर दुरांतो आता सकाळी आठ वाजता पोहोचेल. लातूर आणि बिदर एक्सप्रेस सुद्धा सकाळी आठ वाजताच मुंबईत दाखल होतील. सोलापूर एक्सप्रेस मात्र पाच मिनिटे लवकर म्हणजेच साडेसहा वाजता स्थानकावर येईल. वाराणसीला जाणार्‍या महानगरी एक्सप्रेस बाबत एक मोठा बदल झाला आहे. या गाडीचा शेवटचा थांबा आता वाराणसीऐवजी बनारस करण्यात आला आहे. ही गाडी मुंबईवरून रात्री बारा वाजून पंधरा मिनिटांनी सुटेल आणि पहाटे पावणे चारला बनारसला पोहोचेल. परतीच्या प्रवासात ही गाडी बनारसहून सकाळी पावणे दहा वाजता सुटणार आहे. प्रवाशांनी ऐनवेळी गोंधळ होऊ नये म्हणून रेल्वेच्या अधिकृत भ्रमणध्वनी आज्ञावलीवरून वेळेची खात्री करून घ्यावी असे आवाहन करण्यात आले आहे.

प्रवाशांनो हे नक्की वाचा

गाड्यांच्या वेळा बदलल्यामुळे आपली धावपळ होऊ शकते. विशेषतः महानगरी एक्सप्रेस आता वाराणसीला न जाता बनारसला थांबणार आहे याची नोंद घ्या. रेल्वे स्थानकावर जाण्यापूर्वी घरच्या घरी खात्री करूनच बाहेर पडा. बदलांमुळे प्रवाशांना अधिक सोयीचे वातावरण मिळेल असा विश्वास रेल्वेने व्यक्त केला आहे.