यूट्युब चॅनलने व्हायरल केली भुजबळांच्या निधनाची बातमी

नाशिक / 30 जून: यूट्युब हा सोशल मीडिया प्लॅटफॉर्म तर अनेकांसाठी सर्व गोष्टींची माहिती सहज मिळवण्यासाठी महत्त्वाचे साधन बनले आहे. पण यूट्युब चॅनलच्या माध्यमातून जर का एखादी चुकीची गोष्ट लोकांमध्ये पसरवण्याचे काम केले तर त्याविरोधात यूट्युबकडून अ‍ॅक्शन घेण्यात येते. आता राज्याचे अन्न व नागरी पुरवठा मंत्री छगन भुजबळ यांचे हृदयविकाराच्या झटक्यामुळे निधन झाल्याची बातमी हेल्पलाईन किसान या डिस्प्ले नावाने सुरू असलेल्या यूट्युब चॅनलने त्यांच्या चॅनलवरून प्रसिद्ध केली. त्यावरुन पोलिसांनी गुन्हा दाखल केला आहे.
अज्ञात संशयिताने मुद्दाम भुजबळ यांच्या निधनाची खोटी टॅगलाईन वापरून ही पोस्ट शनिवारी (ता. 28 जून) रात्री साडेनऊच्या सुमारास युट्युबवर अपलोड केली. ही बनावट पोस्ट सुमारे सव्वा लाख लोकांपर्यंत पोहोचली, त्यामुळे समाजात संभ्रम निर्माण होऊन अफवा पसरण्याची आणि जनक्षोभ उसळण्याची शक्यता निर्माण झाली. यामुळे शहराच्या शांततेला धोका निर्माण होण्याची भीती व्यक्त करण्यात आली. ज्यानंतर पोलिसांनी या प्रकरणाची दखल घेत या यूट्युब चॅनलवर गुन्हा दाखल केला आहे. नाशिक शहर आयुक्तालयाच्या विशेष शाखेचे अंमलदार सुनील बहारवाल यांनी शहर सायबर पोलिसात दिलेल्या फिर्यादीनुसार, छगन भुजबळ यांच्या निधनाची खोटी बातमी व्हायरल करणार्‍या यूट्युब चॅनेलविरोधात गुन्हा दाखल करण्यात आला आहे. विशेष शाखेकडून सोशल मीडियावर सतत ऑनलाइन सर्फिंग करून आक्षेपार्ह पोस्टवर करडी नजर ठेवली जाते. सर्फिंगदरम्यान, एका वृत्तवाहिनीचा लोगो वापरून मंत्री छगन भुजबळ यांचे हृदयविकाराच्या झटक्याने निधन अशा आशयाखाली एक व्हिडिओ लिंक निदर्शनास आली. सदर लिंक तपासून पाहिली असता, त्यामध्ये प्रत्यक्षात रंजनीताई बोरस्ते यांच्या निधनाची बातमी होती, ज्यामध्ये मंत्री छगन भुजबळ यांनी युट्युबवर श्रद्धांजली अर्पण केली होती. सोशल मीडियावर अशा प्रकारे दिशाभूल करणारी आणि खळबळजनक माहिती पसरवल्याबद्दल पोलिसांकडून सखोल तपास सुरू आहे.