कोचिंग सेंटरला भीषण आग; 15 विद्यार्थ्यांचा मृत्यू

लखनऊ/22 जून- उत्तर प्रदेशची राजधानी लखनऊमधील अलीगंज भागातील पुरानिया सेक्टर डी येथे असलेल्या एका कोचिंग सेंटरला आज सोमवारी भीषण आग लागल्याची धक्कादायक घटना घडली. या आगीमुळे परिसरात प्रचंड खळबळ उडाली असून, इमारतीमध्ये अनेक विद्यार्थी अडकल्याची भीती व्यक्त केली जात आहे. घटनेची माहिती मिळताच अग्निशामक दलाच्या 8 गाड्या घटनास्थळी दाखल झाल्या असून युद्धपातळीवर बचावकार्य सुरू आहे. या भीषण आगीत आतापर्यंत 15 जणांचा मृत्यू झाल्याचे कळत आहे.
स्थानिक नागरिकांनी दिलेल्या माहितीनुसार, कोचिंग सेंटरच्या इमारतीमध्ये अचानक शॉर्ट सर्किट किंवा विजेच्या ठिणगीमुळे ही आग लागली असावी. आग इतकी वेगाने पसरली की विद्यार्थ्यांना बाहेर पडण्यास मार्ग उरला नाही. प्रत्यक्षदर्शींनी सांगितले की, जेव्हा आग लागली तेव्हा इमारतीमध्ये एकच गोंधळ उडाला. आगीच्या ज्वाला आणि धुराचे लोट पाहून स्वतःचा जीव वाचवण्यासाठी 7 ते 8 विद्यार्थ्यांनी इमारतीवरून थेट खाली उड्या मारल्या. स्थानिक रहिवाशांच्या म्हणण्यानुसार, अजूनही सुमारे 20 ते 25 विद्यार्थी इमारतीमध्ये अडकले असण्याची शक्यता आहे. या दुर्दैवी घटनेची दखल घेत उत्तर प्रदेशचे उपमुख्यमंत्री ब्रिजेश पाठक यांनी तीव्र दुःख व्यक्त केले आहे. त्यांनी ‘द’ (ट्विटर) वर पोस्ट करत म्हटले की, लखनऊच्या पुरानिया येथील कोचिंग सेंटरला लागलेल्या भीषण आगीची बातमी अत्यंत वेदनादायी आणि चिंताजनक आहे. प्रशासनाला तात्काळ मदतकार्य करण्याचे आदेश देण्यात आले आहेत. उपमुख्यमंत्र्यांनी पुढे माहिती दिली की, जखमी विद्यार्थ्यांना तात्काळ उपचारासाठी रुग्णालयात दाखल करण्यात येत असून, त्यांना योग्य ती वैद्यकीय मदत आणि सर्वतोपरी सहकार्य करण्याचे निर्देश अधिकार्‍यांना दिले आहेत. घटनास्थळी तज्ज्ञ डॉक्टरांचे एक पथक आणि 6 रुग्णवाहिका तैनात करण्यात आल्या आहेत. परिस्थितीचा थेट आढावा घेण्यासाठी उपमुख्यमंत्री स्वतः घटनास्थळाकडे रवाना झाले आहेत. सर्व जखमी विद्यार्थी लवकर बरे व्हावेत, अशी मी ईश्वरचरणी प्रार्थना करतो, असेही ते म्हणाले.अग्निशामक दलाचे जवान आणि स्थानिक पोलीस मिळून इमारतीमध्ये अडकलेल्या विद्यार्थ्यांना सुखरूप बाहेर काढण्यासाठी शर्थीचे प्रयत्न करत आहेत. धुराचे साम्राज्य असल्यामुळे बचावकार्यात काही प्रमाणात अडथळे येत आहेत, मात्र प्रशासनाकडून हाय-अलर्ट जारी करून मदतकार्य अधिक वेगवान करण्यात आले आहे. रुग्णालयांनाही सज्ज राहण्याच्या सूचना देण्यात आल्या आहेत