शरद पवार भाजपसोबत जाणार

* काँग्रेसवरही टीका

पिंपरी-चिंचवड/29 डिसेंबर – राष्ट्रवादी काँग्रेसचे अध्यक्ष शरद पवार हे भविष्यात भाजपसोबत सत्तेत सहभागी होतील, असा खळबळजनक दावा वंचित बहुजन आघाडीचे अध्यक्ष प्रकाश आंबेडकर यांनी केला आहे. सध्याची राजकीय परिस्थिती पाहता सुप्रिया सुळे यांना केंद्रीय मंत्रिमंडळात स्थान दिले गेले, तर सेक्युलर मतदारांनी आश्चर्य व्यक्त करू नये, असेही आंबेडकर म्हणाले. ते पिंपरी-चिंचवडमध्ये प्रसारमाध्यमांशी बोलत होते.
पिंपरी-चिंचवड महानगर पालिकेची निवडणूक ही पक्ष विरुद्ध पक्ष अशी नसून ‘गाववाले विरुद्ध बाहेरचे’ अशी असल्याचे थेट वक्तव्य प्रकाश आंबेडकर यांनी केले. 1972 च्या दुष्काळानंतर पिंपरी-चिंचवडमध्ये आलेले अनेकजण येथे स्थायिक झाले, मात्र त्यांना आजही ‘गाववाले’ मानले जात नसल्याचे ते म्हणाले. त्यामुळे ही निवडणूक स्थानिक विरुद्ध बाहेरचे अशीच होणार असल्याचा दावा त्यांनी केला. सेक्युलर मतदारांनी सावध राहावे, असा इशारा देत प्रकाश आंबेडकर म्हणाले की, शरद पवार यांना भाजपकडे जाण्यासाठी सध्या पायवाट तयार केली जात आहे. शरद पवार आणि अजित पवार यांचे विलिनीकरण, अजित पवारांचे भाजपसोबत राहणे आणि त्यातून सुप्रिया सुळे यांना केंद्रीय मंत्रिमंडळात स्थान मिळणे – हे चित्र जर घडले, तर त्यात आश्चर्य वाटू नये. महाविकास आघाडी सोडून शरद पवार सत्तेत सहभागी होतील का, या थेट प्रश्नावर प्रकाश आंबेडकर यांनी होकारार्थी उत्तर दिले. मुंबई महानगरपालिकेच्या निवडणुकीच्या पार्श्वभूमीवर बोलताना त्यांनी काँग्रेसवरही टीका केली. काँग्रेसमधील अनेक स्थानिक नेते फक्त नावापुरते काँग्रेसमध्ये असून त्यांची आत्मा भाजपमध्ये आहे, असा आरोप त्यांनी केला. वंचित बहुजन आघाडीने आधीपासूनच भाजपसोबत न जाण्याची भूमिका घेतली होती आणि उद्धव ठाकरे व शरद पवार यांच्यासोबत जाण्याची तयारी दर्शवली होती. मात्र त्यांनी ‘नारद मुनीची भूमिका’ घेतल्यामुळे एकत्र येण्याऐवजी विघटन झाले, असा आरोपही प्रकाश आंबेडकर यांनी केला.