मराठा आंदोलन संपले मात्र ओबीसी संतप्त

नागपूर / 2 सप्टेंबर : मराठा आरक्षणासाठी मनोज जरांगे पाटील यांनी मागील पाच दिवसांपासून सुरू केलेलं उपोषण मंगळवारी संध्याकाळी संपलं, कारण राज्य सरकारने त्यांच्या आठपैकी सहा मागण्या मान्य केल्या. मुंबईत मराठा कार्यकर्त्यांनी जल्लोष सुरू केला. मात्र, नागपुरात ओबीसी संघटनांनी या निर्णयावर संतप्त प्रतिक्रिया दिली असून, त्यांचे उपोषण सुरूच राहणार असल्याचा इशारा दिला आहे.
जरांगे पाटीलांची प्रमुख मागणी होती की मराठ्यांना ओबीसी कोट्यातून आरक्षण द्यावे. मुंबईत लाखो मराठा समाज बांधवांनी या मागणीसाठी राजधानीत जमून सरकारवर दबाव निर्माण केला होता. त्यावेळी राष्ट्रीय ओबीसी महासंघाचे प्रमुख डॉ. बबनराव तायवाडे यांच्या नेतृत्वाखाली नागपुरातील संविधान चौकात ओबीसींनी साखळी उपोषण सुरू केले होते.
भाजपसह अनेक राजकीय पक्षांच्या ओबीसी नेत्यांनी या आंदोलनाला पाठिंबा दर्शवला होता. ओबीसीतून मराठ्यांना आरक्षण दिलं जाणार नाही याचे सरकारकडून लेखी आश्वासन हवे, अशी मागणी संघटनांची आहे. मंगळवारी जरांगे आणि सरकारच्या प्रतिनिधींनी चर्चा करून सहा मागण्या मान्य केल्या, मात्र ओबीसी संघटनांना त्यावर समाधान नाही. ओबीसी नेत्यांनी स्पष्ट केले की, मराठा समाजाला ओबीसी कोट्यातून आरक्षण देणार नाही, असे लेखी आश्वासन मिळेपर्यंत आंदोलन मागे घेतले जाणार नाही. त्यामुळे जरांगेचे उपोषण संपले असले तरी नागपुरातील ओबीसी आंदोलन सुरू राहणार आहे.
विशेष म्हणजे, 2023 मध्ये ओबीसी संघटनांनी आंदोलन केले होते, तेव्हा तत्कालीन उपमुख्यमंत्री व सध्याचे मुख्यमंत्री देवेंद्र फडणवीस यांनी त्यांना खात्री दिली होती की, त्यांच्या कोट्यातून मराठ्यांना आरक्षण दिलं जाणार नाही. आता पुन्हा त्याच आश्वासनाची मागणी ओबीसी संघटनांकडून करण्यात येत आहे. सरकार आता ओबीसी संघटनांबाबत कोणती भूमिका घेणार, याकडे संपूर्ण समाजाचं लक्ष लागले आहे.