महानगरपालिकेच्या सत्तेचा ‘पेच’ सुटणार

* किंगमेकरच्या भूमिकेमुळे राजकीय समीकरणे बदलली

अमरावती /18 जानेवारी : महानगर पालिकेच्या सार्वत्रिक निवडणुकीत कोणत्याही एका राजकीय पक्षाला स्पष्ट बहुमत न मिळाल्याने सत्तेची चावी आता ’बहुजन समाज पक्षा’च्या हातात आली आहे. अवघ्या तीन जागांच्या बळावर ’किंगमेकर’ ठरलेल्या बसपाने सत्तेत सहभागी होण्यासाठी आपल्या अटींचे शस्त्र उपसल्याने भाजप आणि काँग्रेस या दोन्ही मोठ्या पक्षांची झोप उडाली आहे. प्रभाग क्रमांक 11 मधून तीन जागा जिंकून बसपाने महापालिकेत आपले वजन वाढवले असून, आता उपमहापौर पद आणि स्थायी समिती सभापती पदासाठी जोरदार सौदेबाजी सुरू केली आहे. यामुळे अमरावतीचा पुढचा महापौर कोणाच्या पाठिंब्यावर विराजमान होणार, याकडे संपूर्ण जिल्ह्याचे लक्ष लागले आहे.
अमरावती महापालिकेत सत्ता स्थापनेसाठी सध्या कमालीची चुरस निर्माण झाली असून पडद्यामागे मोठ्या हालचालींना वेग आला आहे. निवडणुकीच्या निकालानुसार, भारतीय जनता पक्षाने 25 जागा मिळवून सर्वात मोठा पक्ष म्हणून स्थान मिळवले आहे, तर काँग्रेसच्या पारड्यात 15 जागा पडल्या आहेत. मात्र, बहुमताचा आकडा गाठण्यासाठी दोन्ही पक्षांना आता बहुजन समाज पक्षाच्या तीन नगरसेवकांच्या टेकूची नितांत गरज आहे. बसपाचे जिल्हाध्यक्ष अजय गोंडाणे यांनी स्पष्ट केले आहे की, जो पक्ष त्यांच्या अटी मान्य करेल त्यालाच सत्तेत सहकार्य केले जाईल. बसपाने प्रामुख्याने उपमहापौर पदासह स्थायी समितीच्या सभापती पदावर आपला दावा ठोकला आहे. या राजकीय संघर्षात आता ’युवा स्वाभिमान पार्टी’चे अध्यक्ष आमदार रवी राणा यांनी उडी घेतली असून त्यांनी थेट उच्च पातळीवर हालचाली सुरू केल्या आहेत. आमदार राणा यांनी बसपाचे प्रदेशाध्यक्ष एडव्होकेट सुनील डोंगरे यांची गुप्त भेट घेतल्याची माहिती समोर आली आहे. या बैठकीत संभाव्य युतीबाबत सकारात्मक चर्चा झाल्याचे समजते, ज्यामुळे भाजप आणि काँग्रेसच्या गोटात अधिकच अस्वस्थता पसरली आहे. बसपाच्या पाठिंब्याशिवाय कोणालाही सत्ता स्थापन करणे तांत्रिकदृष्ट्या अशक्य असल्याने, दोन्ही बड्या पक्षांनी आता बसपाच्या नेत्यांशी संपर्क साधून त्यांना आपल्या बाजूने वळवण्यासाठी आटोकाट प्रयत्न सुरू केले आहेत. यामुळे शहरात राजकीय अनिश्चिततेचे वातावरण असून, बसपाचा ’हत्ती’ नक्की कोणाच्या तंबूत शिरतो, यावरच सत्तेचे भवितव्य अवलंबून आहे.

सत्ता समीकरणाचा गुंता

अमरावती महापालिकेत सत्तेसाठी बसपाचा पाठिंबा अनिवार्य बनला आहे. भाजप 25 आणि काँग्रेस 15 अशा स्थितीमुळे 3 जागा असलेल्या बसपाचे महत्त्व कमालीचे वाढले आहे. आमदार रवी राणा यांच्या मध्यस्थीमुळे नवीन समीकरणे उदयाला येण्याची शक्यता असून उपमहापौर आणि सभापती पदाच्या अटीवरच आता सत्तेची मोहोर उमटणार आहे.