शकुंतला रेल बचाव सत्याग्रह समितिची आढावा बैठक संपन्न

* शेकडो दिव्यांनी सजणार रेल्वे स्टेशन परिसर

अचलपूर /12 ऑक्टोबर : आज रोजी शकुंतला रेल बचाव सत्याग्रह समिती अचलपूरची 37 वी आढावा बैठक साक्षी इन्फोटेक येथे पार पडली. ब्रॉडगेज रेल्वेच्या डीपीआरचे कार्य मार्गी लागल्याने समस्त सत्याग्रहींमध्ये आनंद आणि उत्साहाचे वातावरण दिसत आहे. “आता आपली शकुंतला झुक झुक गाडी लवकरच एक्सप्रेस होईल,” या संयुक्त मताने सत्याग्रह समिती सदस्यांनी पुढेही जाहीर केले की, शकुंतला रेल्वेचे कार्य सुरू होत नाही तोपर्यंत आंदोलन सुरूच राहील.या बैठकीत 37 व्या टप्प्यातील जनआंदोलनाची दिशा, आयोजन, नियोजन आणि सामाजिक उपक्रमांमधून प्रतीकात्मक पण अहिंसक आंदोलनाची रूपरेखा ठरविण्यात आली. या वेळी शहरातील विविध सामाजिक संघटनांचे पदाधिकारी तसेच सत्याग्रही योगेश खानजोड़े, डॉ. राजा धर्माधिकारी, राजेश अग्रवाल, दीपा तायडे, राजकुमार बरडिया, संजय डोंगरे, शंकर बारखडे, प्यारेलाल प्रजापती, राजेंद्र जयसवाल, पंकज गुप्ता, राजेश पांडे, दयाराम चंदेले, उज्ज्वला माकोडे, मुरलीधर ठाकरे, कवी उज्ज्वल अग्रवाल, आकाश श्रीवास्तव आदी उपस्थित होते. दिवाळीच्या पूर्वसंध्येला म्हणजे 20 ऑक्टोबर रोजी सर्व सत्याग्रही दुपारी 4 वाजता रेल्वे स्टेशन परिसरात स्वच्छता अभियान राबवतील आणि रेल्वे स्टेशन क्षेत्रातील नागरिकांना दिवाळी फराळ वाटप करतील. त्यानंतर चिमुकल्या मुलांसोबत आतषबाजी करून सायंकाळी 6 वाजता रेल्वे स्टेशन परिसरात शेकडो हातांनी शेकडो दिवे लावून आशेची दिवाळी साजरी करण्यात येईल, अशी माहिती योगेश खानजोड़े, डॉ. राजा धर्माधिकारी, दीपा तायडे, राजकुमार बरडिया आणि राजेंद्र जयसवाल यांनी दिली. समस्त नागरिकांनीही या उपक्रमात सहभागी व्हावे, असे आवाहन करण्यात आले.