कोट्यवधी मोजून आमचे नगरसेवक फोडले

ऑपरेशन लोटसवर व्यक्त केली नाराजी

नवी दिल्ली/19 नोव्हेंबर : उपमुख्यमंत्री एकनाथ शिंदे यांनी केंद्रीय गृहमंत्री अमित शहांची भेट घेत तक्रारींचा पाढा वाचला आहे. कल्याण-डोंबिवलीत सुरु असलेल्या ऑपरेशन लोटसवरुन शिंदे यांनी अमित शहांकडे स्पष्ट शब्दांत नाराजी वर्तवली आहे. मोठी रक्कम देऊन आमचे माजी नगरसेवक फोडले जात आहेत, असा दावा शिंदे यांनी शहांकडे केला. शिंदे यांनी भाजपचे प्रदेशाध्यक्ष रविंद्र चव्हाण यांची अमित शहांकडे तक्रार केली आहे.
कल्याण-डोंबिवलीत भाजप प्रदेशाध्यक्ष रविंद्र चव्हाण यांनी गेल्या काही दिवसांत अनेक माजी नगरसेवकांचा पक्षप्रवेश घडवून आणला. चव्हाण यांनी शिंदेसेनेचे माजी नगरसेवकही गळाला लावले. त्यामुळे शिंदेसेनेत तीव्र नाराजी आहे. त्याचे पडसाद दिल्लीत उमटले. शिंदे यांनी शहांची भेट घेत प्रदेशाध्यक्ष रविंद्र चव्हाण यांची तक्रार केली. मोठी रक्कम देऊन आमचे माजी नगरसेवक फोडले जात आहेत. सेनेचं नुकसान करण्यासाठी चव्हाण कल्याण-डोंबिवलीत सक्रिय आहेत, असं शिंदे यांनी शहांना सांगितलं. चव्हाण यांना समज देण्याची मागणीदेखील शिंदे यांनी केली. एबीपी माझानं सुत्रांच्या हवाल्यानं हे वृत्त दिलं आहे. महायुती सोबत पुढे गेली पाहिजे. मग मित्रपक्षांचे नगरसेवक का फोडले जात आहेत, असा सवाल शिंदे यांनी शहांना विचारला. भाजपच्या प्रदेशाध्यक्षांनी सर्वांना सोबत घेऊन पुढे जायला हवं. पण चव्हाण कल्याण-डोंबिवलीत सेनेचं नुकसान करत आहेत. कोटींच्या रकमा मोजून आमचे नगरसेवक फोडले जात आहेत. हा प्रकार योग्य नाही, अशी भूमिका शिंदे यांनी शहांसमोर मांडली. रविंद्र चव्हाण यांना समज देण्याची विनंतीदेखील शिंदेंकडून करण्यात आली. रविंद्र चव्हाण महायुतीच्या घटकपक्षांचे नगरसेवक का फोडत आहेत, कल्याण-डोंबिवलीत चव्हाण फोडाफोडीचं राजकारण का करत आहेत, असे प्रश्न शिंदे यांनी शहांसोबतच्या चर्चेत उपस्थित केले. भाजपला भविष्यात कल्याण लोकसभा मतदारसंघावर दावा करायचा आहे का, असा शिंदेंच्या प्रश्नांचा सूर होता. कल्याण-डोंबिवलीत भाजपनं आक्रमक राजकारण सुरु केल्यानं शिंदेसेनेत मोठी अस्वस्थता आहे.