आणखी 208 नक्षल्यांचे छत्तीसगडमध्ये आत्मसर्पण

गडचिरोली /17 ऑक्टोबर : वरिष्ठ नक्षलवादी नेता भूपती उर्फ सोनूने 15 ऑक्टोबरला आपल्या 60 सहकाऱ्यांसह गडचिरोली येथे आत्मसमर्पण केले. त्याच गटातील केंद्रीय समिती सदस्य रुपेशसह आणखी तब्बल 208 नक्षलवाद्यांनी 153 अत्याधुनिक शस्त्रास्त्रांसह छत्तीसगडमधील जगदलपूर येथे मुख्यमंत्री विष्णू देव साय यांच्या उपस्थितीत शरणागती पत्करल्याने नक्षल संघटनेला दुसरा सर्वात मोठा धक्का बसला आहे. जगदलपूर येथील पोलीस परेड ग्राऊंडवर ‘पुना मरगेम’ (नवी पहाट, नवा रस्ता) या नावाने आयोजित कार्यक्रमात मुख्यमंत्री विष्णू देव साय आणि उपमुख्यमंत्री तथा गृहमंत्री विजय शर्मा यांच्या उपस्थितीत हे सर्वजण समाजाच्या मुख्य प्रवाहात सामील झाले. यावेळी भारतीय संविधानाची प्रत आणि गुलाबपुष्प देऊन त्यांचे स्वागत करण्यात आले. आत्मसमर्पण केलेल्यांमध्ये केवळ संख्येनेच नव्हे, तर चळवळीतील महत्त्वाच्या पदांवरील नेत्यांची संख्या मोठी असल्यामुळे बस्तर विभाग पूर्णपणे नक्षलमुक्त झाल्याचा दावा केला जात आहे. आत्मसमर्पण केलेल्यांमध्ये केंद्रीय समिती सदस्य रुपेश (45, तेलंगणा) याच्यासह दंडकारण्य स्पेशल झोनल कमिटीचे चार प्रमुख सदस्य भास्कर उर्फ राजमन मंडावी, माड डिव्हिजनची प्रमुख रनिता, राजू सलाम आणि धन्नू वेत्ती उर्फ संतू यांचा समावेश आहे. याशिवाय विभागीय समितीचे 21 सदस्य, एरिया कमिटीचे 61 सदस्य आणि 98 सदस्यांनी एकाच वेळी हिंसेचा मार्ग सोडला आहे. भूपतीचा समर्थक आणि गेल्या तीन दशकांपासून चळवळीत सक्रिय असलेल्या आणि रणनीतीकार म्हणून ओळखल्या जाणार्‍या रुपेशने आत्मसमर्पण करण्यापूर्वी एक व्हिडिओ संदेश जाहीर करून आपल्या सहकाऱ्यांना बदललेली परिस्थिती आणि आत्मसमर्पणाची मागील कारणे समजून घेण्याचे आवाहन केले होते.

गडचिरोलीतही दोन दिवसांपूर्वी पॉलिट ब्यूरो सदस्य मल्लोझुला वेणुगोपाल राव उर्फ भूपतीने 60 जणांसह आत्मसमर्पण केले होते. तत्पूर्वी अबुजमाड आणि गडचिरोलीच्या सीमा भागात भूपती, रुपेश यांच्यासह काही महत्त्वाच्या नेत्यांची बैठक झाली होती, ज्यात आत्मसमर्पणासंदर्भात चर्चा झाली. बैठकीत ठरल्याप्रमाणे भूपती काही सहकाऱ्यांसह गडचिरोली पोलिसांकडे शरण आला, तर रुपेशला छत्तीसगडमध्ये आत्मसमर्पण करण्यास सांगितले गेले. याबैठकीत मतभेद देखील झाले, ज्यामुळे काही नक्षल्यांनी आत्मसमर्पणास नकार देत जंगलाची वाट धरली. पोलीस सूत्रांनुसार येत्या काही दिवसात आणखी नक्षलवादी आत्मसमर्पण करण्याच्या तयारीत आहेत.