शहरात दुचाकी चोरटा जेरबंद

* धरमकाटा परिसरात विक्रीसाठी आला अन् फसला

अमरावती/6 मार्च : शहरात वाढत्या दुचाकी चोरीच्या घटनांना चाप लावण्यासाठी सुरू असलेल्या शोधमोहिमेला मोठे यश आले असून, एका सराईत चोरट्याला चोरीच्या गाडीसह रंगेहात पकडण्यात आले आहे. पंचवटी उड्डाणपुलाखालून चोरलेली गाडी विकण्याच्या प्रयत्नात असलेल्या या तरुणाला सापळा रचून ताब्यात घेण्यात आले असून, त्याच्याकडून महागडी दुचाकी जप्त करण्यात आली आहे.
अमरावतीच्या गुन्हेगारी विश्वावर वचक बसवण्यासाठी सध्या विशेष मोहीम राबवण्यात येत आहे. या मोहिमेदरम्यान 6 मार्च 2026 रोजी एक तरुण धरमकाटा परिसरात संशयास्पद रित्या विना क्रमांकाची दुचाकी घेऊन उभा असल्याची खात्रीशीर माहिती मिळाली. या माहितीच्या आधारे तातडीने धाड टाकून सोहेल खान सलीम खान (वय 20 वर्ष, रा. छायानगर, अक्सा मशीद जवळ, अमरावती) याला ताब्यात घेण्यात आले. त्याची कसून चौकशी केली असता, त्याने सुमारे सात ते आठ महिन्यांपूर्वी पंचवटी चौक येथील उड्डाणपुलाखालून ही काळ्या रंगाची ’हिरो स्लेंडर प्लस’ दुचाकी चोरल्याची कबुली दिली. जप्त करण्यात आलेल्या या दुचाकीची किंमत सुमारे 55 हजार रुपये असून तिचा इंजिन क्रमांक H-LOERGHH90353 असा आहे. या कारवाईमुळे शहरातील दुचाकी चोरट्यांचे धाबे दणाणले असून, गाडगे नगर पोलीस ठाण्यात दाखल असलेला गुन्हा आता उघडकीस आला आहे. आरोपीला पुढील कायदेशीर प्रक्रियेसाठी संबंधित विभागाच्या स्वाधीन करण्यात आले आहे. या मोहिमेत वरिष्ठ मार्गदर्शनाखाली पथकातील सर्व अंमलदारांनी मोलाची भूमिका बजावली असून, शहरात अशाच प्रकारे गुन्हेगारांचा बंदोबस्त सुरू राहणार असल्याचे स्पष्ट करण्यात आले आहे.