अमरावतीत एका दिवसात तीन जणांच्या आत्महत्या

अमरावती / 17 सप्टेंबर : अमरावती शहर व ग्रामीण पोलीस आयुक्तालय क्षेत्रात एका दिवसात आत्महत्येच्या तीन वेगवेगळ्या घटना समोर आल्या आहे. नांदगाव पेठ, भातकुली व फ्रेजरपुरा पोलीस ठाण्यांच्या हद्दीत या घटना घडल्या. कठोरा गावातील श्रीकांत अण्णासाहेब काळे (43), गणोजा देवी येथील राजू गोविंदराव गावनेर (52) व अमरावती शहरातील किरणनगर गल्ली क्रमांक 2 येथील रहिवासी विशाल किसनराव माहोरे (34) यांनी आत्मघाती पाउल उचलून जीवनयात्रा संपवली.
कठोरा गावातील श्रीकांत काळे हे मागील दोन वर्षांपूर्वी घेतलेले कर्ज फेडण्यात अपयशी ठरत होते. त्यामुळे त्यांना प्रचंड मानसिक ताण निर्माण झाला होता. चिंतेच्या झटक्यात त्यांनी 15 सप्टेंबर रोजी स्वतःच्या घरात विष प्राशन केले. उपचारासाठी त्यांना स्थानिक पीडीएमसी रुग्णालयात दाखल करण्यात आले; मात्र रात्री 11 वाजता त्यांनी अखेरचा श्वास घेतला. त्यांचे बंधू प्रशांत काळे यांनी ही माहिती पोलीसांना दिली. फ्रेजरपुरा पोलीस ठाण्याच्या हद्दीत किरणनगरमधील विशाल किसनराव माहोरे हे मद्य व गांजाच्या व्यसनाला बळी पडले होते. 16 सप्टेंबर रोजी मद्यधुंद अवस्थेत त्यांनी स्वतःच्या घरात फास लावून आत्महत्या केली. गंभीर अवस्थेत त्यांना तत्काळ जिल्हा सरकारी रुग्णालयात हलविण्यात आले. मात्र तेथे वैद्यकीय अधिकार्‍यांनी तपासणीदरम्यान त्यांना मृत घोषित केले. अचानक झालेल्या या प्रकारामुळे परिसरात हळहळ व्यक्त केली जात आहे.
दरम्यान, भातकुली पोलीस ठाण्याच्या कार्यक्षेत्रातही अशीच एक घटना घडली. गणोजा देवी येथील राजू गोविंदराव गावनेर (52) यांनीही जीवनातील वेगवेगळ्या ताणतणावांना कंटाळून विष सेवन केले. कुटुंबीयांची वेळची खबरदारी घेतली तरीही रुग्णालयात पोहोचवण्यात विलंब झाला. त्यांच्या मुलगा अनिकेत गावनेर यांनी त्यांना जिल्हा रुग्णालयात दाखल केले होते; पण वैद्यकीय उपचारांदरम्यान 16 सप्टेंबर रोजी रात्री त्यांचा मृत्यू झाला. तीन्ही घटनांमध्ये अनुक्रमे नांदगाव पेठ, फ्रेजरपुरा आणि भातकुळी पोलीस ठाण्यांनी आकस्मिक मृत्यूची नोंद करून तपास सुरू केला आहे. काहींवर आर्थिक संकट तर काहींवर व्यसनाधीनतेची छाया, अशा विविध कारणांनी शहर व जिल्ह्यात आत्महत्यांचे प्रमाण चिंताजनक स्थितीत पोहोचल्याचे या घटनांमधून स्पष्ट झाले आहे.