संत गाडगे बाबा प्रभागात कमळ आणि घड्याळाचा विजयोत्सव

* दिग्गजांच्या बालेकिल्ल्यात नव्या दमाच्या उमेदवारांनी उडवला विजयाचा गुलाल 

* भाजप-2, राकॉ (अजित गट) 2 यांनी राखली प्रभागाची शान

अमरावती /16 जानेवारी : महानगर पालिकेच्या निवडणुकीत संत गाडगे बाबा-पीडीएमसी प्रभाग दोनमध्ये मतदारांनी आपला स्पष्ट कौल दिला असून भाजप आणि राष्ट्रवादी काँग्रेसच्या उमेदवारांनी विजयाची मोहोर उमटवली आहे. एकूण पंचवीस उमेदवारांच्या नशिबाचा फैसला झालेल्या या रणधुमाळीत प्रस्थापित चेहर्‍यांना बाजूला सारत मतदारांनी विकासाला पसंती दिली. या निवडणुकीत माजी नगरसेवकांसह अनेक बड्या नेत्यांना पराभवाचे तोंड पहावे लागले असून महायुतीच्या उमेदवारांनी मोठ्या मताधिक्याने आपला विजय निश्चित केला आहे. सविस्तर बातमी: अमरावतीच्या स्थानिक राजकारणात अत्यंत प्रतिष्ठेच्या मानल्या जाणार्‍या या निवडणुकीत प्रभाग एक मधील निकालांनी सर्वांच्या भुवया उंचावल्या आहेत. प्रभाग एक (अ) गटामध्ये भारतीय जनता पक्षाचे विनोद गणेश तनबैसे यांनी 4449 मते मिळवून काँग्रेसच्या रवी विठ्ठलराव वानखडे यांचा पराभव केला. वानखडे यांना 3851 मतांवर समाधान मानावे लागले. तसेच प्रभाग एक (ब) मध्ये राष्ट्रवादी काँग्रेसच्या मीना योगेश सवई यांनी 4054 मते घेत विजय संपादन केला. या गटात भाजपचे उमेदवार स्वामी अमोल निस्ताने यांनी 4349 मते मिळवून कडवी झुंज दिली परंतु त्यांना विजयाने हुलकावणी दिली. प्रभाग एक (क) मध्ये भाजपच्या सुरेखा दिगंबर लुंगारे यांनी 6064 मतांचा प्रचंड डोंगर उभा करत काँग्रेसच्या राजश्री मोहन क्षीरसागर यांना धूळ चारली. क्षीरसागर यांना 3711 मते मिळाली. प्रभाग एक (ड) मध्ये राष्ट्रवादी काँग्रेसचे प्रमोद सुधाकर महल्ले यांनी 4521 मते मिळवून विजयाची माळ आपल्या गळ्यात टाकली. त्यांनी माजी नगरसेवक बाळू शंकर भुयार यांचा पराभव केला. भुयार यांना 3242 मते मिळाली. या निवडणुकीत भाजपचे बादल कुळकर्णी, काँग्रेसचे बाळू शंकर भुयार, बंडखोर उमेदवार चंद्रकांत बोमरे आणि भाजपचे स्वामी अमोल निस्ताने या दिग्गजांना पराभवाचा धक्का सहन करावा लागला. मतदारांनी दिलेल्या या कौलामुळे शहराच्या राजकारणात आता नवीन समीकरणांचा उदय झाला असून कार्यकर्त्यांमध्ये आनंदाचे वातावरण पसरले आहे. विशेष लक्षवेधी घडामोडी दिग्गजांच्या पराभवाचे मुख्य कारण या निवडणुकीत मतदारांनी प्रस्थापित सत्ताधीशांना नाकारून नवीन उमेदवारांवर विश्वास दर्शवला आहे. भाजप आणि राष्ट्रवादी काँग्रेसच्या समन्वयामुळे काँग्रेसच्या बालेकिल्ल्याला मोठे खिंडार पडले असून बंडखोरी करणार्‍या उमेदवारांनाही जनतेने घरचा रस्ता दाखवला आहे. विकासाच्या मुद्द्यासमोर दिग्गज नेत्यांचा करिश्मा फिका पडल्याचे या निकालावरून स्पष्टपणे दिसून येत आहे.