अमरावतीत बाल महोत्सवाचा दिमाखदार समारोप

* आज रंगणार बक्षीस वितरणाचा शानदार सोहळा

अमरावती /19 जानेवारी : जिल्ह्याच्या महिला व बालविकास विभागाच्या वतीने आयोजित ’चाचा नेहरू जिल्हास्तरीय बाल महोत्सव 2025-26’ चा तीन दिवसांचा उत्साह आज आपल्या परमोच्च शिखरावर पोहोचला असून, मातोश्री विमलाताई देशमुख सभागृहात सकाळी 11 वाजता या महोत्सवाचा भव्य बक्षीस वितरण समारंभ संपन्न होत आहे. 19 जानेवारीपासून सुरू झालेल्या या महोत्सवात जिल्ह्यातील बालगृहातील मुलांनी आपल्या सुप्त गुणांचे दर्शन घडवले असून, आज मान्यवरांच्या उपस्थितीत या गुणवंत बालकांचा गौरव केला जाणार आहे.
विदर्भाच्या सांस्कृतिक पंढरीत म्हणजेच अमरावतीत गेल्या तीन दिवसांपासून बालकांच्या किलबिलाटाने आणि विविध स्पर्धांनी वातावरण चैतन्यमय झाले होते. जिल्हा महिला व बालविकास अधिकारी कार्यालयाने या महोत्सवाचे नेटके नियोजन केले होते. आजच्या या विशेष सोहळ्याला विभागीय उपायुक्त अब्दुल चौधरी, जिल्हा विधी सेवा प्राधिकरणाचे सचिव डी. एस. वमने, श्री शिवाजी अध्यापक विद्यालयाचे प्राचार्य डॉ. सुहास उमाळे आणि जिल्हा कार्यक्रम अधिकारी विलास मरसाळे यांची प्रमुख उपस्थिती लाभणार आहे. यासोबतच बाल विकास प्रकल्प अधिकारी डॉ. उमेश टेकाळे (पूर्व) व विलास दुर्गे (पश्चिम), जिल्हा समन्वय अधिकारी रंजन वानखडे, बाल कल्याण समितीच्या अध्यक्षा किरण पूंशी, बाल न्याय मंडळाचे सदस्य महावीर वासनिक आणि जिल्हा महिला व बालविकास अधिकारी अतुल भडांगे हे देखील या समारंभाची शोभा वाढवणार आहेत. या संपूर्ण आयोजनात जिल्ह्यातील सर्व बालगृहांचे कर्मचारी, अधिकारी आणि विद्यार्थ्यांनी मोठ्या संख्येने उपस्थित राहावे, असे आग्रही आवाहन जिल्हा महिला व बालविकास अधिकारी अतुल भडांगे तसेच बालगृह संस्थाप्रमुख व कर्मचारी संघटनेचे अध्यक्ष गजानन देशमुख यांनी केले आहे. हा महोत्सव केवळ एक स्पर्धा नसून अनाथ आणि गरजू बालकांच्या स्वप्नांना उभारी देणारा एक महत्त्वाचा टप्पा ठरला आहे.