अंबानगरीच्या विकासाला राजकारणाची खीळ

* निवडणुकीच्या रिंगणात पैशांचा अलोट पूर

अमरावती /14 जानेवारी : शहराच्या हृदयस्थानी असलेल्या अंबादेवी परिसरातील वाहतूक कोंडी आणि नियोजित पुलाचा प्रश्न आता राजकीय आखाड्यात चांगलाच तापला आहे. शहराच्या विकासाचा मुख्य कणा असलेल्या या पुलाला सत्ताधार्‍यांच्या कुटील कारस्थानाने आणि प्रशासनाच्या चुकीच्या नियोजनाने ब्रेक लावल्याचे स्पष्ट चित्र दिसत आहे. माजी लोकप्रतिनिधी आणि सध्याच्या उमेदवारांमध्ये सुरू असलेल्या वर्चस्वाच्या लढाईत सामान्य अमरावतीकर मात्र भरडला जात आहे. वाहतुकीची कोंडी सोडवण्याऐवजी ती अधिक गुंतागुंतीची कशी होईल, असेच धोरण राबवले गेल्याने आज रुग्णवाहिकांपासून ते दैनंदिन प्रवाशांपर्यंत सर्वांनाच मरणयातना सोसाव्या लागत आहेत. विशेष म्हणजे, या गंभीर समस्येवर तोडगा काढण्यासाठी कोणत्याही राजकीय पक्षाने आजवर प्रामाणिक इच्छाशक्ती दाखवलेली नाही, ही वस्तुस्थिती चीड आणणारी आहे.
निवडणुकीच्या रणधुमाळीत आता नगरसेवक होण्यासाठी केवळ जनसेवा नव्हे, तर कोट्यवधी रुपयांची उलाढाल होताना दिसत आहे. ही लोकशाहीची निवडणूक नसून जणू व्यापार झाला आहे की काय, असा प्रश्न उपस्थित होत आहे. राजकीय समीकरणांचा विचार करता, काँग्रेसमध्ये गटबाजी उफाळून आली असली तरी माजी आमदार यशोमती ठाकूर आणि शहराध्यक्ष बबलू शेखावत आपली ताकद पणाला लावून जनसंपर्क वाढवत आहेत. दुसरीकडे, भाजपच्या अंतर्गत वादामुळे आणि रवी राणा यांनी उभ्या केलेल्या स्वतंत्र व्यासपीठामुळे पक्षाची मोठी पडझड होताना दिसत आहे. राष्ट्रवादी काँग्रेसचे उमेदवार खोडके दांपत्य आपल्या नियोजित चालींनी मैदानात टिकून आहेत. जुन्या मराठी आणि हिंदी भाषिक वादाला पुन्हा फोडणी देऊन मतांचे ध्रुवीकरण करण्याचा प्रयत्न केला जात असला, तरी सुज्ञ मतदार आता विकासाच्या मुद्द्यावर कोणाला कौल देणार, याकडे संपूर्ण जिल्ह्याचे लक्ष लागले आहे.

राजकीय पेचप्रसंग

सत्तासंघर्षात विकासाचा बळी अंबापुलाचे रखडलेले काम आणि वाहतुकीचे चुकीचे नियोजन यामुळे अमरावतीचे जनजीवन विस्कळीत झाले आहे. काँग्रेसचे खासदार बळवंत वानखडे यांनी रेल्वे मंत्र्यांना साकडे घातले असले तरी निकाल शून्य आहे. भाजपमधील अंतर्गत गटबाजी आणि राष्ट्रवादीच्या घड्याळाची अचूक चाल यामुळे यंदाची निवडणूक चुरशीची ठरेल. मतदारांनी आता विकासासाठी खंबीर भूमिका घेणे काळाची गरज आहे.