‘हिंदुस्थानात दुसर्‍या क्रमांकावर हिंदी भाषेचा सन्मान…,’

-ठाकरे बंधूंवरही शरसंधान
अमरावती /12 जुलै: राज्यात त्रिभाषा धोरणावरुन वाद उफाळला होता. सध्या तो शमला असताना मात्र नवनीत राणांनी मोठं विधान केलं आहे. हिंदी भाषेला दुसर्‍या क्रमांकांवर ठेवून आम्ही सन्मान करतो, असे राणा म्हणाल्या आहेत. तर उद्धव ठाकरे आणि राज ठाकरेंवरही त्यांनी टीका केली आहे. हिंदूंचं विभाजन करु नका, असेही त्या ठाकरे बंधूंना उद्देशून म्हणाल्या.
भाजप नेत्या माजी खासदार नवनीत राणा यांनी अमरावतीमध्ये आयोजित गुणवंत विद्यार्थ्यांच्या सत्कार समारंभामध्ये भाषेच्या मुद्द्यावर भाष्य केले आहे. त्या म्हणाल्या, मला शेवटच्या श्वासापर्यंत मराठीचा अभिमान राहील. कारण मी या महाराष्ट्रात जन्माला आली. ज्या राज्यात तुम्ही राहता, ती भाषा सगळ्यात पहिली असते. माझी जन्मभूमी व कर्मभूमीची भाषा मराठी असल्याने मी तिला समोर ठेवणार आहे, पण ज्या हिंदुस्तानमध्ये मी राहते तेथील हिंदी भाषेला सुद्धा दुसर्‍या क्रमांकावर ठेवून त्या भाषेचा सन्मान करतो.
ठाकरे बंधूंवर निशाणा साधत राणा म्हणाल्या, उद्धव ठाकरे आणि राज ठाकरे हे स्वतःची राजकीय पोळी शेकण्याकरिता देवेंद्र फडणवीस यांच्यावर टीका करत आहेत. मराठी व हिंदी भाषिकांमध्ये तेढ निर्माण करण्याचे काम ते करतात त्यांनी हे सांगावं की त्यांची मुलं मराठी शाळेत शिकले की हिंदी भाषेत शिकले? तर बरेच नेते हे हिंदी आणि मराठी भाषेमध्ये वाद घालून महापालिकेची पोळी शिकण्याचा प्रयत्न करत आहे. कंधो से उचित छाती नही होती, धर्म से बडी कोई जाती नही होती। दीपक ही नही बचा तो बाकी का क्या करोगे? अगर धर्म ही नही बचा तो जाती का क्या करोगे। त्यामुळे हिंदुस्थानात माझ्यासाठी धर्म आहे, कर्म आहे, पूजा आहे. यामध्ये हिंदूंचं विभाजन करू नका, असे वक्तव्य करत नवणीत राणांनी ठाकरे बंधूंना सुनावले.