अमरावती जिल्ह्यात पावसाचा तडाखा, शेती संकटात

-हजारो हेक्टर क्षेत्र बाधित
अमरावती / 28 सप्टेंबर : महाराष्ट्रातील अन्य जिल्ह्यांप्रमाणेच गत आठवड्यात जिल्ह्यालाही मुसळधार पावसाचा जोरदार तडाखा बसला. अमरावती जिल्ह्यात मुसळधार पावसामुळे खरीप हंगामात मोठे नुकसान झाले आहे. काही तालुक्यांत सरासरीपेक्षा जास्त पावसाने पिके पाण्याखाली गेली, तर काही तालुक्यांत पावसाचा अभाव असल्याने पिकांची वाढ खुंटली आहे. जिल्ह्याच्या तालुकानिहाय आकडेवारीनुसार सोयाबीन, कापूस तसेच कडधान्यांचे उत्पादन करणारे शेतकरी मोठ्या अडचणीत आले आहेत.
अमरावती तालुक्यात 110 मिमी पावसाची नोंद झाली असून सुमारे 14,500 हेक्टर क्षेत्रातील सोयाबीन व कापूस पिके पाण्याखाली गेली आहेत. मोर्शी तालुक्यात 95 मिमी पावसाने नदीकाठची शेती जलमय झाली असून 12,300 हेक्टर क्षेत्र प्रभावित झाले आहे. नांदगाव खंडेश्वर तालुक्यात 87 मिमी पावसाने 10,800 हेक्टर क्षेत्रातील सोयाबीन व कापूस पिकांचे नुकसान झाले आहे. दर्यापूर तालुक्यात 102 मिमी पावसाची नोंद झाली असून 15,600 हेक्टर क्षेत्रातील भात पिकावर गंभीर फटका बसला आहे. अचलपूर तालुक्यात 98 मिमी पावसामुळे 13,400 हेक्टर क्षेत्रातील भात व सोयाबीनचे नुकसान झाले आहे. धामणगाव रेल्वे तालुक्यात 90 मिमी पावसाने 9,200 हेक्टर क्षेत्र बाधित झाले असून भात पिकावर रोगराईचा धोका वाढला आहे.
चांदूर बाजार व चांदूर रेल्वे तालुक्यांत अनुक्रमे 82 व 85 मिमी पावसाची नोंद झाली. चांदूर बाजार तालुक्यात 8,600 हेक्टर तर चांदूर रेल्वे तालुक्यात 9,000 हेक्टर क्षेत्र प्रभावित झाले आहे. कडधान्ये व सोयाबीन पिकांमध्ये जादा आर्द्रतेमुळे रोगराई पसरत आहे. दर्यापूर तालुक्यातील काही गावांमध्ये धुराडी भिजल्याने मूग व उडीद पिकांचे मोठे नुकसान झाले आहे.
मेलघाटातील धारणी व चिखलदरा तालुक्यांत अनुक्रमे 120 व 115 मिमी पावसाची नोंद झाली असून धारणी तालुक्यात 16,200 हेक्टर व चिखलदरा तालुक्यात 14,800 हेक्टर क्षेत्र पावसामुळे बाधित झाले आहे. या भागात मका व भात पिके उगवली असली तरी सततच्या पावसामुळे खत व कीडनाशक फवारणी करणे अवघड झाले आहे. त्यामुळे रोगराई वाढण्याची शक्यता तज्ज्ञांनी व्यक्त केली आहे. नद्यांना पूर आल्याने अनेक शेतकर्‍यांची शेतं जलमग्न झाली आहेत.
अमरावती जिल्ह्यातील बदलत्या हवामानामुळे खरीप हंगामाचे भविष्य धोक्यात आले असून उत्पादन घटल्यास शेतकर्‍यांचे आर्थिक संकट आणखी गहिरे होणार आहे. शेतकरी संघटनांनी तातडीने पंचनामे करून नुकसानग्रस्त शेतकर्‍यांना मदत द्यावी, अशी मागणी केली आहे.
-शेतकर्‍यांच्या प्रमुख अडचणी
अमरावती जिल्ह्यात सर्वच तालुक्यांमध्ये अतिवृष्टीमुळे सोयाबीन व कापूस पाण्याखाली गेल्याने उत्पादन घटण्याची दाट शक्यता आहे. पिकावर रोगराईचे संकटही वाढले आहे. काही भागात पावसाचा अभाव तर काही ठिकाणी अतिवृष्टीचा दणका बसला, त्यामुळे शेतकर्‍याला यंदा पावसाने साथ दिलेली नाही, हे स्पष्ट झाले आहे. अती पावसामुळे गरज असताना खत व कीडनाशक फवारणी करण्यास शेतकर्‍यांना अडचणींचा सामना करावा लागत आहे. धुराडी भिजल्याने कडधान्याचे मोठ्या प्रमाणात नुकसान झाले आहे.