बडनेरातील हत्या प्रकरणात पाच जणांना अटक

* बडनेरा पोलिसांची तडकाफडकी कारवाई

अमरावती/25 सप्टेंबर : अंजनगाव बारी येथील नायरा पेट्रोल पंपाचे संचालक मिलिंद मुरलीधर लाड (46, जुनी वस्ती, बडनेरा) यांची बुधवारी रात्री हॉटेल राणमाळजवळ अज्ञात हल्लेखोरांनी निर्घृण हत्या केली. ही घटना रात्री 9:30 ते 10:00 च्या दरम्यान घडली. त्यांच्या मित्रासोबत दोघे पेट्रोल पंपावरून जुनी वस्ती येथील त्यांच्या घरी दुचाकीवर जात होते. हॉटेल राणमाळजवळील वळणावर धारदार शस्त्रांनी सज्ज असलेल्या अज्ञात हल्लेखोरांनी त्यांच्यावर हल्ला केला. त्यांच्या मित्राने पळून जाण्याचा प्रयत्न केला, परंतु हल्लेखोरांनी त्यांच्यावर सपासप वार केले आणि पळून गेले. माहिती मिळताच बडनेरा पोलिसांचे पथक घटनास्थळी पोहोचले आणि त्यांनी त्यांना तातडीने रुग्णालयात दाखल केले; परंतु तोपर्यंत त्यांचा मृत्यू झाला होता. ही घटना उघडकीस येताच संपूर्ण परिसरात मोठी खळबळ उडाली.

दरम्यान, बडनेरा पोलिसांनी प्रकरणाचा तपास सुरू केला आणि गुरूवारी सकाळी 5:30 च्या सुमारास तीन संशयितांना ताब्यात घेतले, त्यापैकी दोघे अल्पवयीन असल्याचे सांगण्यात आले. प्राथमिक अंदाजानुसार हा सुपारी देऊन हत्याकांड झाल्याचा अंदाज व्यक्त करण्यात येत आहे. सखोल तपासानंतर पोलिसांनी मुख्य सूत्रधार विक्रम लाड, जो मृतकाचा चुलत भाऊ होता, त्याला अटक केली; त्यानेच या घटनेची सुपारी दिली होती. आतापर्यंत पाच जणांना अटक करण्यात आली असून संशयितांची संख्या वाढण्याची शक्यता आहे.

मिळालेल्या माहितीनुसार, बडनेरा शहरातील अंजनगाव बारी रोडवर असलेल्या रायसोनी कॉलेजसमोरील जुनी वस्ती बारीपुरा येथील रहिवासी मुरलीधर लाड यांचा मुलगा मिलिंद लाड (46) याचा पेट्रोल पंप व्यवसाय आहे. पेट्रोल पंप मुरलीधर आणि त्याचा भाऊ राजू लाड यांनी संयुक्तपणे सुरू केला होता. नंतर मालमत्तेच्या वादामुळे, मिलिंद लाड याने तो बळकावला, आणि तेव्हापासून मिलिंद आणि त्याचा चुलत भाऊ यांच्यात वाद सुरू होता. नंतर वाद मिटला आणि मिलिंद लाड पेट्रोल पंप चालवत राहिला. मिलिंदचे बारीपुरा येथे हार्डवेअर दुकान देखील होते; तो अभियंता होता व मालमत्तेचा व्यवहार करत असे, परंतु त्याच्या मनात राग कायम होता.

बुधवार, 24 सप्टेंबर रोजी रात्री 10 वाजताच्या सुमारास, मिलिंद लाड पेट्रोल पंप बंद करून त्यांच्या कर्मचारी चंदन मोरेसोबत दुचाकी क्र.एमएच 27/सीजे 9693 वर घरात जात होते. रात्रीच्या अंधारात दबा धरून बसलेल्या हल्लेखोरांनी हॉटेल राणमाळपासून थोड्या अंतरावर त्यांच्यावर चाकूने सपासप वार केले. या घटनेदरम्यान मिलिंदसोबत असलेला कर्मचारी चंदन मोरे घाबरून पळून गेला आणि हॉटेलमध्ये प्रवेश करून मालकाला घटनेची माहिती दिली. हल्लेखोर अजूनही मिलिंद लाडवर हल्ला करत होते; त्यांनी त्यांना बेशुद्ध आणि रक्ताने माखलेल्या अवस्थेत सोडून त्यांच्या दुचाकीवरून पळून जाण्यास सुरुवात केली. जास्त रक्तस्त्राव झाल्याने मिलिंद लाड यांचा जागीच मृत्यू झाला.

घटनेची माहिती मिळताच बडनेरा पोलिस ठाण्याचे प्रभारी सुनील चव्हाण त्यांच्या पथकासह घटनास्थळी पोहोचले. घटनास्थळी नागरिकांची मोठी गर्दी जमली होती. पोलिसांनी पंचनामा करून मृतदेह शवविच्छेदनासाठी जिल्हा रुग्णालयात पाठविला. पोलिस उपायुक्त गणेश शिंदे, एसीपी कैलाश पुंडकर आणि गुन्हे शाखेच्या पथकाने घटनास्थळी भेट दिली आणि जवळील सीसीटीव्ही कॅमेरे तपासण्यास सुरुवात केली. सीसीटीव्ही फुटेजमध्ये दोन संशयित दुचाकीवरून निघून जात असल्याचे दिसून आले असून पोलिसांना चार जणांचा यात सहभाग असल्याचा संशय आहे. पेट्रोल पंपावरून दोन जण मिलिंद लाडचा पाठलाग करत होते, तर घटनास्थळापासून काही अंतरावर अंधारात उभे होते. हल्लेखोरांनी हॉटेल राणमाळपासून थोड्या अंतरावर मिलिंद लाडला थांबवले आणि त्याच्यासोबत असलेल्या कर्मचार्‍याला धमकावून तेथून पळवून लावले.