अमरावतीमध्ये काँग्रेसने साजरी केली ‘काळी दिवाळी’

* नुकसानग्रस्त शेतकर्‍यांना मदत न मिळाल्याने रोष

अमरावती / 17 ऑक्टोबर – जिल्ह्यात अतिवृष्टीमुळे बाधित शेतकऱ्यांच्या समस्यांकडे सरकारचे लक्ष वेधण्यासाठी अमरावती जिल्हा काँग्रेस कमिटीने शुक्रवारी काळी दिवाळी निषेध आंदोलनाचे आयोजन केले. अतिवृष्टीमुळे नुकसान झालेल्या शेतकऱ्यांच्या समर्थनार्थ सर्व काँग्रेस नेते आणि पदाधिकाऱ्यांनी जिल्हाधिकारी कार्यालयासमोर झुनका-भाकर खाऊन सरकारच्या शेतकरीविरोधी धोरणांचा निषेध नोंदवला. या आंदोलनाचे नेतृत्व अमरावती जिल्ह्याचे खासदार बळवंत वानखेडे यांनी केले. दिवाळीच्या उत्सवात मिठाई आणि चविष्ट पदार्थांवर बहिष्कार टाकत साधे बेसन आणि भाकर खाऊन राज्य सरकारचा निषेध व्यक्त करण्यात आला. या निषेध आंदोलनात काँग्रेसचे अनेक वरिष्ठ पदाधिकारी आणि कार्यकर्ते मोठ्या संख्येने उपस्थित होते. कृषी उत्पन्न बाजार समितीचे अध्यक्ष हरीश मोरे, काँग्रेस तालुका अध्यक्ष अमित गावंडे, अनुसूचित जाती विभागाचे जिल्हाध्यक्ष प्रवीण मनोहर, गजानन राठोड, श्याम देशमुख, शैलेश गवई, बाळासाहेब देशमुख आणि तिवसा विधानसभा युवक काँग्रेस अध्यक्ष शैलेश काळबांडे यांनी या निषेधात सहभाग घेतला. सर्वांनी एकमुखाने शेतकऱ्यांच्या समस्यांवर लक्ष वेधत शासनाचा निषेध नोंदवत काळी दिवाळी साजरी केली.