नेहरू मैदान सील करण्याची तयारी?

* तातडीने दोन्ही बाजुचे गेट बंद

अमरावती/18 ऑक्टोबर : जिल्हाधिकार्‍यांच्या आदेशानुसार शहराच्या मध्यभागी असलेले ऐतिहासिक नेहरू मैदान अवघ्या दोन दिवसांत सील केले जाण्याची शक्यता आहे. दोन्ही प्रवेशद्वारांवर लोखंडी गेट बसवण्यात आले असून, अधिकार्‍यांनी जाहीर केले आहे की पुढील आठवड्यात संपूर्ण मैदान स्वच्छ करून ते फक्त नागरिकांच्या येण्या-जाण्यासाठी खुले ठेवले जाईल. दरम्यान, जिल्हाधिकारी आशिष येरेकर यांच्याशी संपर्क साधण्याचा प्रयत्न करण्यात आला मात्र त्यांच्याशी संपर्क होऊ शकला नाही.

गेल्या आठवड्यापासून नेहरू मैदान चर्चेत आहे. महापालिकेच्या विशेष बैठकीत आमदार संजय खोडके यांनी नेहरू मैदानाच्या जागेवर नवीन महापालिका कार्यालय बांधण्याच्या प्रस्तावावर चर्चा केली होती. त्यानंतर भाजप आणि काँग्रेस या दोन्ही पक्षांनी या प्रस्तावाला तीव्र विरोध दर्शवला. या पार्श्वभूमीवर नेहरू मैदानाचा मुद्दा राजकीय रंग घेत असून भाजप आणि काँग्रेसमध्ये शाब्दिक युद्ध पेटले आहे. आगामी महानगरपालिका निवडणुका लक्षात घेऊन राजकीय नेते या विषयाकडे वळले असल्याचे दिसून येते.

नेहरू मैदान सध्या चर्चेचा केंद्रबिंदू बनले असून नागरिकांचे लक्ष या घडामोडींवर केंद्रित झाले आहे. या पार्श्वभूमीवर जिल्हाधिकार्‍यांनी मैदानाच्या साफसफाईचे आदेश दिले आहेत. प्रशासनाने तत्काळ स्वच्छतेची मोहीम राबवावी असे निर्देश देण्यात आले. तथापि, महानगरपालिका प्रशासनाने या आदेशांकडे दुर्लक्ष केल्याची चर्चा आहे. त्यामुळे मैदानाची बिघडत चाललेली स्थिती पाहून जिल्हाधिकार्‍यांनी विशेष अधिकारांचा वापर करून कारवाई सुरू केली.

जिल्हाधिकार्‍यांनी अधीनस्थ अधिकाऱ्यांना कडक सूचना दिल्याचे समजते आणि सरकारी यंत्रणेने जलदगतीने कारवाई सुरू केली आहे. जयस्तंभच्या बाजूने कचरा टाकणे बंद झाले असून दोन्ही बाजूंना मोठी लोखंडी गेट बसवण्यात आली आहेत. यामुळे कचरा टाकण्यास प्रतिबंध येणार असून अवैध पार्किंगलाही आळा बसेल. तसेच, मैदानात तळ ठोकणाऱ्या भटक्यांनाही मज्जाव करण्यात येईल.

या संदर्भात आमच्या प्रतिनिधीशी बोलताना एसडीओ अनिल भाटकर यांनी सांगितले की, “नेहरू मैदानाच्या दोन्ही बाजूंना जयस्तंभ आणि राजकमल चौकाच्या दिशेने गेट बसवण्यात आले आहेत. जिल्हा दंडाधिकाऱ्यांच्या आदेशानुसार नेहरू मैदान पूर्णपणे कचरामुक्त करण्याची कारवाई सुरू आहे,” असे त्यांनी स्पष्ट केले.