संजय खोडके यांची राष्ट्रवादीच्या संघटन महासचिव पदी नियुक्ती

मुंबई/14 ऑक्टोबर – राष्ट्रवादी काँग्रेसचे राष्ट्रीय अध्यक्ष व महाराष्ट्राचे उपमुख्यमंत्री अजित पवार यांनी पक्षाच्या संघटनात्मक पुनर्रचनेच्या दिशेने आणखी एक निर्णायक पाऊल उचलत पक्षाचे ज्येष्ठ नेते व विधानपरिषद सदस्य संजय खोडके यांना ‘संघटन महासचिव’ म्हणून नियुक्त केले आहे, ज्यामुळे पक्षातील नव्या घडामोडी आणि संघटन बळकटीकरणाचे प्रयत्न अधिक वेगाने राबवता येणार आहेत; गेल्या काही महिन्यांपासून ‘राष्ट्रवादी चिंतन शिबिर’ आणि ‘राष्ट्रवादी परिवार मिलन’ सारख्या उपक्रमांमधून संवाद व तळागाळाशी संपर्क वाढवण्याचे प्रयत्न सुरू होते आणि आता या नव्या पदनिर्मितीमुळे कार्यकर्त्यांच्या अडचणी व सूचना थेट पक्ष संघटनेपर्यंत पोहोचण्याचे निश्चित माध्यम मिळणार आहे. एनएससीआय, वरळी येथे आज झालेल्या महत्त्वाच्या बैठकीत उपमुख्यमंत्री अजित पवार यांच्या उपस्थितीत सर्व आमदार आणि जिल्हाध्यक्ष सहभागी होते; येत्या स्थानिक स्वराज्य संस्था निवडणुकांच्या पार्श्वभूमीवर पक्षाच्या संघटनात्मक तयारीचा रोडमॅप ठरविण्यावर चर्चा झाली, ‘राष्ट्रवादी कनेक्ट’ नावाच्या नव्या मोबाईल अ‍ॅपद्वारे एकसंध संवादयंत्रणा व कार्यकर्त्यांमधील समन्वय बळकट करण्याचा निर्णय झाला आणि जिल्हा पातळीवर नियमित ‘राष्ट्रवादी परिवार मिलन’ कार्यक्रमांचे आयोजन करणे, प्रत्येक बूथ स्तरावर संघटन मजबूत करणे, आमदार व जिल्हाध्यक्ष यांच्यातील संवाद सुलभ करणे व सर्व स्तरावर निवडणूक नियोजन समन्वयपूर्वक राबविण्याचे उद्दिष्ट ठरवण्यात आले. बैठकीत शिस्त, संघभावना व जबाबदारी हे प्रत्येक कार्यकर्त्याचे मूलभूत मूल्य राहावे, संघटनात्मक उपक्रमांचे मूल्यमापन करावे आणि पुढील काही महिन्यांसाठी संवाद व जनसंपर्काचे स्पष्ट उद्दिष्ट निश्चित करावे, या मुद्द्यांवर सविस्तर विचारमंथन झाले.