पालघरमध्ये केमिकल कंपनीत भीषण स्फोट; एकाचा मृत्यू

मुंबई/19 सप्टेंबर – पालघर जिल्ह्यातील मनोर रोडवर असलेल्या जेपी उद्योगनगरमधील लिंबानी सॉल्ट इंडस्ट्रीज या केमिकल कंपनीत गुरुवारी सकाळच्या सुमारास भीषण स्फोट झाला. या दुर्घटनेत एका कामगाराचा मृत्यू झाला असून चार कामगार गंभीर जखमी झाले आहेत. या स्फोटामुळे परिसरात मोठी घबराट पसरली आहे. स्फोट इतका तीव्र होता की त्याचा आवाज आसपासच्या भागांमध्येही ऐकू गेला. स्थानिकांनी तात्काळ पोलिसांना आणि अग्निशमन दलाला याची माहिती दिली. काही वेळातच पालघर पोलीस आणि फायर ब्रिगेडची टीम घटनास्थळी दाखल झाली आणि बचावकार्य सुरू करण्यात आले. पालघरचे पोलीस अधीक्षक यतीश देशमुख यांनी दिलेल्या प्राथमिक माहितीनुसार, लिंबानी सॉल्ट इंडस्ट्रीजमध्ये केमिकल प्रोसेसिंग सुरू असताना अचानक स्फोट झाला. स्फोटाच्या वेळी कंपनीत पाच कामगार उपस्थित होते. त्यापैकी दीपक शिरोली (वय 38) या कामगाराचा घटनास्थळीच मृत्यू झाला. इतर चार कामगार जखमी झाले असून त्यांना तातडीने ढवले रुग्णालयात दाखल करण्यात आले आहे. जखमींपैकी सुरेश कोम (55) यांच्या पाठीवर गंभीर भाजल्याच्या जखमा असून दिनेश गदग (40) यांच्या चेहर्‍यावर गंभीर दुखापत झाली आहे. डॉक्टरांनी या दोघांची प्रकृती चिंताजनक असल्याचे सांगितले आहे. उर्वरित दोघे – लक्ष्मण मंडल (60) आणि संतोष तारे (51) – हे किरकोळ जखमी झाले असून त्यांच्यावर प्राथमिक उपचार सुरू आहेत. घटनास्थळी उपस्थित असलेल्या प्रत्यक्षदर्शींनी सांगितले की, स्फोट इतका प्रचंड होता की काही क्षणांसाठी संपूर्ण परिसर हादरून गेला. कंपनीच्या आवारात धुराचे मोठे लोट पसरले होते आणि कामगारांमध्ये प्रचंड घबराट पसरली होती. स्थानिक नागरिकांनी देखील मदतीसाठी पुढे येत बचाव कार्यात हातभार लावला. या दुर्घटनेबाबत पोलिसांनी तपास सुरू केला असून स्फोट नेमका कशामुळे झाला, याची चौकशी सुरू आहे. प्राथमिक तपासानुसार, केमिकल प्रक्रिया सुरू असताना सुरक्षा नियमांचे पालन करण्यात निष्काळजीपणा झाल्याची शक्यता वर्तवली जात आहे. दरम्यान, स्थानिक रहिवासी आणि कामगार संघटनांनी कंपनी व्यवस्थापनावर गंभीर आरोप केले आहेत. त्यांच्यानुसार, लिंबानी सॉल्ट इंडस्ट्रीजमध्ये पूर्वीही अशा प्रकारच्या घटनांचा अनुभव असून कंपनीत योग्य सुरक्षा उपाययोजना नसल्याने कामगारांचे प्राण धोक्यात येतात. प्रशासनाकडून संपूर्ण घटनेची चौकशी केली जात असून दोषींवर कठोर कारवाई केली जाईल, असे ओशासन पोलिसांनी दिले आहे. सध्या रुग्णालयात जखमींच्या प्रकृतीवर लक्ष ठेवले जात असून कंपनी परिसरात सुरक्षा वाढवण्यात आली आहे. या दुर्घटनेनंतर केमिकल उद्योगांमध्ये सुरक्षेच्या उपाययोजनांबाबत नव्याने प्रश्न उपस्थित झाले आहेत.