पुढील 7 दिवस देशात पाऊस घालणार धुमाकूळ

-सतर्क राहण्याचा इशारा
मुंबई / 23 जून: महाराष्ट्रासह देशभरातील अनेक राज्यांतील काही जिल्ह्यांसाठी पुढील 7 दिवस अत्यंत महत्वाचे असणार आहेत. 25 जूनपासून काही राज्यांमध्ये मुसळधार ते अतिमुसळधार पाऊस कोसळेल, असा अंदाज भारतीय हवामान खात्यानं वर्तवला आहे. त्यामुळं नागरिकांनी सतर्क राहावे, असं आवाहन देखील केलं आहे. हवामान खात्यानं वर्तवलेल्या अंदाजानुसार, उत्तर-पश्चिम भारतात (वायव्येकडील राज्ये) बुधवार, 25 जूनपासून मुसळधार पाऊस पडण्याची शक्यता आहे. या कालावधीत पावसाचा जोर अधिक वाढू शकतो, असंही त्यात म्हटलं आहे.
येत्या सात दिवसांत मध्य, पूर्व आणि इशान्य भारतातील काही भागांत मुसळधार ते अतिमुसळधार पाऊस पडण्याची शक्यता आहे. तर मध्य प्रदेशच्या पश्चिमेकडील भागात पुढील 24 तासांत अतिवृष्टी होण्याचा अंदाज आहे, अशी माहिती हवामान खात्याकडून देण्यात आली. तत्पूर्वी हवामान खात्याकडून राजधानी दिल्लीत सोमवारी दिवसभर जोरदार पावसाचा इशारा देण्यात आला आहे. जोरदार वार्‍यांसह ढगांच्या गडगडाटासह पाऊस कोसळेल, असा अंदाज वर्तवला आहे. दिल्लीला येलो अलर्ट देण्यात आला आहे. हवामान खात्याच्या अंदाजानुसार देशाची राजधानी दिल्लीत सोमवारी हलका ते मध्यम स्वरुपाचा पाऊस, विजांचा कडकडाट आणि ढगांच्या गडगडाटासह पाऊस कोसळेल; तसेच संध्याकाळी ते रात्रीच्या सुमारास 30 ते 40 किलोमीटर प्रतितास वेगाने वारे वाहण्याची शक्यता आहे. पुढील तीन दिवस दिल्लीत पावसाची शक्यता व्यक्त करण्यात आली आहे. राजधानी दिल्लीत आज सोमवारी किमान तापमान 28.4 अंश सेल्सियस नोंदवण्यात आले आहे. कमाल तापमान 36 अंश सेल्सियसपर्यंत राहील असाही अंदाज व्यक्त करण्यात आला आहे.
हवामान खात्याच्या ताज्या अंदाजानुसार, 23 ते 27 जून या कालावधीत मध्य प्रदेशातील विविध ठिकाणी मुसळधार ते अतिमुसळधार पावसाचा अंदाज व्यक्त करण्यात आला आहे. तर बिहार, झारखंड, ओडिशा, छत्तीसगडमधील वेगवेगळ्या ठिकाणी मुसळधार पाऊस कोसळण्याची शक्यता आहे. 25 आणि 26 जून या दोन दिवसांत महाराष्ट्रातील विदर्भात, 24 ते 27 जून या कालावधीत पश्चिम बंगाल आणि सिक्किम, 23 आणि 24 जून रोजी बिहारमध्ये, 26 जून रोजी झारखंडमध्ये, 25 आणि 26 जून रोजी ओडिशा आणि पश्चिम बंगालच्या काही भागात मुसळधार पाऊस पडण्याचा अंदाज व्यक्त करण्यात आला आहे. हवामान खात्याच्या माहितीनुसार, अंदमान आणि निकोबार बेटावर ढगांचा गडगडाट आणि विजांचा कडकडाट, तसेच 40 ते 50 किलोमीटर प्रतितास वेगाने वारे वाहतील. बहुतांश ठिकाणी हलका आणि मध्यम स्वरुपाचा पाऊस पडण्याची शक्यता आहे. 25 ते 27 जून या कालावधीत जम्मू-काश्मीर, लडाख, मुझफ्फराबाद, पंजाब, हरयाणामधील विविध ठिकाणी मुसळधार पाऊस कोसळण्याचा अंदाज आहे. याच कालावधीत देशाची राजधानी दिल्लीत पावसाची शक्यता वर्तवण्यात आली आहे.