गणेशोत्सवासाठी आयुक्तालय क्षेत्रात तगडा पोलीस बंदोबस्त

-आरसीपी, क्यूआरटी, एसआरपीएफ आणि होमगार्डचा समावेश
-संवेदनशील भाग आणि गर्दीच्या ठिकाणी ‘फिक्स पॉईंट्स’
अमरावती / 26 ऑगस्ट : शहरातील गणेशोत्सव उत्साहाने सुरू होणार असून 27 ऑगस्टपासून 6 सप्टेंबरपर्यंत शहरभर धूमधाम पाहायला मिळणार आहे. आयुक्तालय क्षेत्रात 547 गणेश मूर्त्यांची स्थापना होणार आहे, त्यापैकी 471 गणेश मंडळांना ऑनलाईन परवानगी देण्यात आली आहे. गणेशोत्सवाच्या सुरक्षित आयोजनासाठी पोलिस आयुक्त अरविंद चावरिया यांच्या नेतृत्वाखाली अमरावती पोलिस दल पूर्णपणे सज्ज आहे.
शहरातील 10 पोलिस ठाण्यांच्या क्षेत्रांमध्ये 3 डीसीपी, 3 एसीपी, 30 निरीक्षक, 70 एपीआय-पीएसआय आणि एकूण 1350 जवान तैनात राहणार आहेत. यासोबतच आरसीपी व क्यूआरटी प्लाटून, एसआरपीएफ कंपनी, 500 पुरूष-स्त्री होमगार्ड यांचा सहभाग असणार आहे. सुरक्षेच्या दृष्टीने सर्व मिरवणूक मार्गांवर सीसीटीव्ही आणि वीडियोग्राफरद्वारे सतत देखरेख केली जाईल. स्थापनेच्या दिवशी बुधवारी ज्वलनशील पदार्थ, शस्त्र, लाठी, आपत्तिजनक गीत आणि झाकी यावर पूर्णपणे बंदी असणार आहे. तसेच हिस्ट्रीशीटर, धार्मिक तणाव निर्माण करणारे गुन्हेगारी तत्व, सांप्रदायिक दंग्यांच्या आरोपींवर प्रतिबंधात्मक कारवाई केली जाईल.
शहरातील महत्त्वाच्या चौकांमध्ये आणि संवेदनशील भागांमध्ये फिक्स पॉईंट्स तयार करण्यात येणार आहे. नागरिकांच्या सुरक्षिततेसाठी 14 सीआर मोबाईल वाहने आणि महिला सुरक्षेसाठी 10 दामिनी पथक तैनात आहेत. तसेच वृद्ध नागरिक व बालकांसाठी बीट मार्शल आणि डायल 112 वाहन सतत पेट्रोलिंग करतील. पोलिस आयुक्त अरविंद चावरियांनी नागरिकांना आवाहन केले आहे की, सामाजिक सलोखा, जातीय ऐक्य व शांती राखून सुरक्षा व्यवस्था कायम ठेवावी. त्यांनी सर्व शहरवासियांना आगामी गणेशोत्सव आणि धार्मिक पर्वासाठी शुभेच्छा दिल्या आहेत.