योगासने व प्राणायामाने शरीर सुदृढ व निरोगी बनते

गुरुकुंज-मोझरी/20 मे : व्यायामे जडत्व जाई दुरी, अंगी येई तरतरी, रक्त-व्यवस्था उत्तम शरीरी, वाढे विचारी सजीवपण असे राष्ट्रसंत तुकडोजी महाराजांनी ग्रामगीतेत म्हटल्याप्रमाणे योगासने व प्राणायामाच्या नियमित सरावाने व्यक्तीचे मन, मनगट आणि मस्तक मजबूत होत असल्याने बाल-तरुणांनी शालेय अभ्यासासोबतच सूर्य-नमस्कार, व्यायाम व मैदानी खेळ खेळावेत. कारण योगासने व प्राणायामाने शरीर सुदृढ, लवचिक आणि निरोगी बनते, असे प्रतिपादन दूरदर्शन व आकाशवाणी लोक-कलावंत प्रमोद पोकळे यांनी केले.
गुरुकुंज-मोझरी नजिकच्या राष्ट्रसंत अध्यात्म केंद्र, दासटेकडी येथे 1 मे पासून आरंभ झालेल्या श्रीगुरुदेव सर्वांगीण सुसंस्कार शिबिरातील विद्यार्थ्यांना सूर्य-नमस्कार, योगासने व प्राणायाम या तासिकेत व्यायामाचे महत्त्व विशद करताना प्रमोद पोकळे बोलत होते. आज सर्वजण मान, पद, प्रतिष्ठा, पैसा, करिअर यामागे लागले असून चुकीच्या सवयीत अडकल्याने कमी वयात अटॅक व विविध महाभयंकर दुर्धर आजाराने ग्रस्त आहेत. यावर व्यायाम हा रामबाण उपाय असून निरोगी जीवनाचा मूलमंत्र आहे, असेही ते म्हणाले. संपूर्ण लोक-सहकार्यावर चालणार्‍या या शिबिरात विदर्भातील सुमारे 120 शिबिरार्थी दाखल झाले असून देश-धर्म-संस्कृतिच्या संवर्धनार्थ बौद्धिक, व्यायाम व भजन-संगीताचे शिक्षण सेवाभावी शिक्षकांकडून दिले जात आहे.
श्रीगुरुदेव राष्ट्रधर्म प्रचार संस्थेद्वारा सुमारे 21 दिवस चालणार्‍या या शिबिराच्या यशस्वितेसाठी शिबीर-प्रमुख रवींद्र ढवळे, रूपेश मोरे, गणेश दरवरे, योगेश मेंढे, मयुर इंगळे, वेदांत अढाऊ, नयन प-हाड, ओम् नन्नावरे, कुंदन गुडधे, पुष्कर गुडधे, निवृत्ती इंदुरकर, अरुण फंदे, हभप दिनकर चोरे, प्रमोद पोकळे, डॉ.नरेंद्र तराळे, अभिनय काळे, छगनराव मोरे, सदानंद जोगी तर व्यवस्थापनाची जबाबदारी रवींद्र वानखडे सांभाळत आहेत.